Pathian Min Sersat Hlah (Ex. 20:7)

THIANG THLARAU PATHIAN CUNG PALHMI SUALNAK
(1) NA PATHIAN MIN KHA SERSATNAK IN VA HMANG HLAH
    Thiang Thlarau Pathian i a min cu theih awk a harbik mi asinain hman awk a fawibik mi asi. Hi ruangah hin thiang Thlarau Pathian min kha fawitein cemchih in bia an chimnak cu “Na Pathian min kha sersatnak in va hmang hlah” (Ex. 20:7) timi Pathian nawlbia kha fawitein a buar asi. Bawipa Jesuh Khrih nih Bible ca chungah ralring a kan pekmi cu- (Mat. 12:31-32) ah “Minung hi sualnak zeipaoh an tuahmi le thil `halo a chimmi cu ngaihthiam khawh an si ko lai; sihmanhsehlaw Thiang Thlarau ralchanh in bia `halo a chimmi cu tuchan ah siseh, hmailei chan ah siseh ngaihthiam khawh an si lai lo. Mi Fapa ralchanh in bia `halo a chimmi cu ngaihthiam khawh an si ko lai; sihmanhsehlaw Thiang Thlarau ralchanh in bia `halo a chimmi cu tuchan ah siseh, hmailei chan ah siseh ngaihthiam khawh an si lailo” tiah a ti. 
    Cuti asiahcun Thiang Thlarau Pathian i a min kha fawitein hman khawh asilo kha ralring a herh ti a fiang. Hi ruangah hinpei hlan pupa Bupi pale hna nih Thiang Thlarau Pathian kong kaupi in `ial ding kha ralring tein an rak tuah kha kan hmuh hna. Thiang Thlarau Pathian he pehtlaihin a rak `ial hmasabiktu cu St. Athanasius asi^.14 A hawi, siangbawi pakhat simi Serapion cu bawmh a hal caah a sinah cakuat pakhat a `ial i, cu cakuat hna ahcun Thiang Thlarau cu Pa Pathian le Fapa Pathian hna he pumkhat in Pathian pakhat sinakin aa tel. Thiang Thlarau cu Pathian huham menmen asilo. Pathian taktak asi tiah fingtein a cawnpiak.

    Aruang cu, khi caan lio ah Khrihfa zumtu cheukhat cu Thiang Thlarau kha Pathian taktak asinak kha an al i, Pa Pathian, Fapa Pathian he aa khatin thangthat, biak le conglawmh a tlaklo tiah an rak cawnpiak hna, Amah cu, kha a palhmi zumhnak kha lehrulh dingah a rak `ialmi asi. Thiang Thlarau Pathian kong a `ial a chimtu cu ralring tein tuahding asinak kong kha St. Athanasius nih voitampi ralrin peknak a `ial. Abikin amah nih ralrinnak a pekmi cu; “Lungthin thar le nunnak thar kha Pathian nih a kan pek lai kha lungthin thar le nunnak (thlarau) thar ngeihkhawh dingah amah Thlarau kha zumtu hna thinlung chungah ka khumh lai tiah bia a kan kamh (Eze 36:26-27). Hitin a chim tikah minung thinlung thlarau le Thiang Thlarau kan palhsual lo ding le kan cawhkalh suallo ding kha abiapi”. Ka Thlarau cu nan chungah ka khumh lai i ka nawlbia he aa tlakin kan umter hna lai i ka phunglam zulh in nan nung lai (Eze. 36:27) tiah a rak ti.¹⁵

Ahleice in St. Athanasius nih ralring a pekmi cu minung lungthin, minung ruahnak, intuarhnak, minung i thinlung thlarau le Thiang Thlarau Pathian i forhfialnak, rian`uannak hna kha cawhkolh in Thiang Thlarau Pathian cung sual tuahnak lei phanhlo ding kha asi.¹⁶

14. Saint Athanasius; The letter of saint Athanasius Concerning the Holy Spirit, trans. with introduction and notes. C.R.B Shapland (London; The Epworth Press. 1951).

15. St. Athanasius, Epitile 1:9, In the letters of Saint Athanasius concerning the Holy spirit,81.

16. St. Athanasius, Epistile 1:9. In the letters of Saint Athanasius concerning the Holy Spirit, 81,82.