Ramkhel lei nawlngeihnak

Mikip nih me thlakkhawhnak nawl an ngei

Aakhatmi ramkhel lei nawlngeihnak
(a). Mikip an nunnak `thancho dingin a pical chiah in `tuanchuah lio mi ramkhel ah lungduhnak an ngeicio lai. Ramkhel timi cu mah nunnak he dairek in a pehtlaimi asi. Cuccah ramkhel ah dairek in i telnak nawl a ngei lai.
(b). Ramkhel ah zalongtein soiselnak nawl
(c). Me thlaknak nawl
(d) ramkhel party hna ah dairek i tel in i zuamnak (thimnak) nawl, kuzale sinak in i telkhawhnak nawl.
(e) Ramchung i a canglio mi ramkhel thlawngpang, buaibainak hna kha theihnak nawl, a`thabik siding in ruahnak peknak nawl le zalongtein cekhlatnak nawl, `tial le soisel ruahnak peknak nawl, meeting tuahnak nawl tiah nawlngeihnak a ngei lai.
(f). Ramchung uktu hna timhtuahnak, hmaithlak mi vialte kha hngalhnak nawl an ngeicio lai.
    Minung nawlngeihnak tinvo kha mikip nih i tluk ruangtein cohlannak nawl an ngei lai. Cubantuk nawlngeihnak pekdingah mikip nih zalonnak a ngei cio lai. Ramkhel zalonnak, biaknak lei zalonnak, zalongtein fimcawnnak, mah theihthiamnak cio in rian`uannak, ca`tial le cauk chuahnak, zalongtein chimrelnak, lemsoinak le meeting tuahnak hna kha onh asilai.
(g). Mah le rampi ngeihchiat rumnak vialte kha aatluk tein conak nawl a umcio lai. Rampi chawva rumnak cu mipi nih mahle huham ningin, `thathnem ngaiin nunkhawhnak ca i tinkhawhnak caah asi. Ram uktu cheukhat le sipuazi rian`tuan cheukhat hna lawng nih an co ahcun aa ningcang mi asilo. Ram pakhat ahhin rumnak le sifahnak aa thlautuk ahcun cu hmun ah aakhatmi nawlngeihnak a umlo. Cubantuk hmunah aatlukmi huham dirkamh mi upadi khuhchilhnak le a santlaihnak thazaang a der timi fiangtein 
theihkhawh asi.

`Tuanvo Hna
    Minung covo tiah kan aupi i `tuanvo hna kha zeirellonak cu kut pakhat in inn pakhat sak i adang kut pakhat in hrawh he aakhat. Nawlngeihnak kha theih hnuah mahle hngalhnak ningin `thutum ding, rian`uan cio ding `tuanvo kan ngei cang. Nunnak nawlngeihnak chungah mikip i nunnak kha upat awk `tuanvo, huham ngeitein nung `thut-um khawhnak caah zuamding `tuanvo, ahmaanmi kha kawl awk `tuanvo hna kan ngei cang.
    Minung nawlngeihnak timi cu, minung nunnak rawhrallo, `tuanchuk terlo, atling cikcek mi minung sinak in nunkhawhnak, ahnubik ah zungzal tlamtlinnak kha hmuh khawhnak caah aherhbik mi asi. Cucaah minung nawlngeihnak timi cu, mivialte `thathnemnak caah a herhmi, afekmi kengruh bantuk le suttung bantukin a dirkamh mi asi. Cutlukin abiapi mi minung nawlngeihnak ngeihlo ahcun minung sinakin kan nunnak cu AIDS zawtnak a ngeimi mizaw bantukin nunning `umchuknak, rawhralnak hna he lawng kan tonding asi. Cucaah minung tinvo kan sungh sicun hmuh`han khawhnak ding kan zuam awk `tuanvo cu mikip nih kan ngeihmi `tuanvo asi. Minung tinvo hna kha aamahkhan, humhimnak a pe ding mi ramrian, hunchonak, zatlang nunphung tahfung hna kha hmunkhat tein i thim a hau. Minung covo hna kha a khamhpiak i a humhimter ding mi upadi hna serpiak ding aherh.
    Minung nawlngeihnak timi cu, minung pakhat sinakin nunkhawhnak caah a umlo awk  a`halo mi tinvo asi. Cucaah mahle tinvo sunghlo dingin, sersat namnehnak inglo dingin kan i kham lai.
    Maria Adela Antokoletz nih “Sunghmi minung covo hmuh`than dingah ral a tuklo mi phu cu a zawmi an si kha thil sining `ihnak, thinphan thlalaunak tangah a nung khuasa mi phu nih an ton i an in theo. Cubang cun Argentina ah kannih nih kan in ... kan inncio ah daitein umkhawh asilo” tiah a rak ti. 33 Michael K. Duffey, Sowing Justice, Reaping Peace, Case Studies of Racial, Religious and Ethnic Healing A round the World, Sheed Eward, Franklin. Chicago 2001. p. 164.
    “Minung nawlngeihnak halnak” kan tilio caan ah ramkhel lei party nih pek dingin halmi asilo. Cu nawlngeihnak cu ramkhel lei party nih pekkhawh mi asilo. Uktu bawi president zong nih a pe kho lo. Mah nunnak chungah a pil i aathup mi tinvo kha zalongtein langhter `than khawhnak caah kan halmi asi. Mah zalonnak, theihthiamnak, thilti khawhnak hna in man nunning, mah innchungkhar, mahle phu, mah rampi `hanchonak caah tuahkhawh ding mi tinvo hna kha kan halmi asi.

Add new comment

1 + 7 =