Lungtlin lo, Chimthlenmi Lehrulhnak Hna

     Hi thil umtu ningcang ruangah kan farnu a simi vawlei pumpi cu a kakip in hnon a ingmi hna he hmunkhat tein a ttap aihram in amah kha pungsan thar in tuahto hawikomh cio dingah zaangfah a kan nawl. Kannih fonh in umnak vawlei pumpi kha a luancia kum (200) lonh chungah vawlei pumpi kha khonden fahter dingin hrem le serhsatnak tlukin zeibantuk kumzabu chung hmanh ah an rak tuah bal lo.

     Asinain kan Bawipa Pathian cu amah he kutsih in, vawlei pumpi a rak ser lio i a tinhmi timhlamhnak he aa tlak tein vawlei pumpi daihnak, a nuam a dawhnak, tlin cikceknak hna caah i bawmhcio in rianttuan dingah kannih kha sawm kan si. Hi harnak piahtana kha tlangtlak fianter dingah a herhmi nunphung pungsan prokarem hna kan sinah a um rih lo kha kan hmuh. Hi harnak piaktana tlangtlak fianternak ah tulio minung vialte le hmailei chanthar cipeh hna herhbaunak le an tthathnemnak kha ruahchan in zulhawk lamthar an chuak rih lo.

     Kokek pawngkam untu ningcang kha zohkhenh khamhpiak dingah ttuannak nawl tahnak rikhiah piaktu ding upadi ramri hna kha chiahpiak dingin a herh hrimhrim mi asi. Cuticun tuahpiak khawhlo ahcun mi hna zalonnak le ningcangnak hna a lotlau lai i, sipuazi le fimthiamnak hna hrambunh mi nawlngeitu phu hna cu ramkhel le minung zalonnak, ningcangnak hna kha khuhchilh in an lonh te lai. Hi harnak piahtana he pehtlaih in ramkip he pehtlaimi ramkhel lei chungkhar in lehrulhnak cu lungtlin awk a silo kha kan hmuh. Kokek pawngkam thurhnawmhnak kha tlangtlak fianter dingah an tuahcio mi vawleicung a sangbik minung hna tonnak meeting ah an sunghnak hna cu kannnih ram hna i ramkhel vawlei kha sipuazi rianttuantu hna le fimthiamnak lei thiamsang hna nih an khuhchilh mi kha fiangtein kan hmuh.

     Minung hna nih papek in an ttuannak hna cu a tamtuk i siapuazi rianttuantu hna cu an ca tthathnemnak kha khonden terlo dingin thawngzamh media pawl kha ningcang loin an teithlak hna i siapuazi rianttuantu mitlawmte i tthathnemnak cu mitam uak i tthathnemnak cungah teinak a hmuh kha kan hmuh. 2007 kum ah an tuahmi thlanglei America ram Bishop hna i ‘Aparecido Document’ biaknak tonpumhnak meeting in an thanhmi cathanh ah kokek vawlei chungchuak thilri kong tlangtlak fianternak ah nunnak hrampi a hrawklio mi siapuazi rianttuan mitlawmte i tthathnemnak kha teinak pek awk a tlaklo tiah a langhter. Fimthiamnak lei thiamsang hna le tangka lei mirum sipuazi rian hna an i komh ruangah annih tulio caan te i tthathnemnak he aa pehtlai lomi ceihkhan awk a simi konglam hna kha an hnon tawn.

    A hnu pehzulhnak in kannih tambik kan i ruahchan khawhmi thil cu a lenglang lawng thlanchuah ngolnak in thawngthanhnak, a caancaan ah zatlang nunphung kha hmuhsak in rianttuannak, kokek pawngkam caah thin a phannak kong, hrial awk tthalo biachimnak hna lawngte kan hmuh i zatlang phu hna chungin phu ttengnge hna i kokek pawngkam harnak piahtana caah thlennak tuahding a herhnak kong, biatak tein zaangfah zawnruahnak chiah in hmuhsaknak hna kha sullam ngeilo mi, saduhthahnak menmen asi, annih ca santlaih tthathnemnak caah donkhantu asi, tiah an ti i an hnon tawn.