Ti thurhnawmhak le Zawtnak

TI A THURHNAWMNAK LE ZAWTNAK PHUNPHUN A CHUAHNAK
29.     Abiapi mi harnak piahtana pakhat cu mi sifak hna caah an hmuhkhawh dingmi dinti phun asi. Annih cu nifate in sivai aa telmi a thianglomi ti kha an dinsual ruangah thihnak, a thianglo mi ti he pehtlai mi zawtnak phunphun a chuahnak, tichung i a ti khomi chemical thilri hna he aa pehtlaihmi zawtnak hna zong an ton.

Thisen chungtlik, awfah zawtnak le ngal-eo zawtnak a chuahnak cu ti a zaceo in hmuhlonak, a thianglo mi ti dinsualnak ruangah asi i cuhna ruangah minung cu harnak tampi nih a den hna i ngakchia mino hna zong tampi an thi.

Hmun tampi hna ah abikin upadi nih a uklo mi hmun hna ahcun, vawlei chungchuak thil cawhnak, cinthlaknak rian ah datnon le rungrul thahnak si hmannak, sehzung rian`tuannak ah a pilmi datthil- chemical thilri hna ruangah vawlei tang tilam hna le avuisih (tikhur) hna in dopmi ti hna zong a thiannak a zorter.

Sehzung rian`tuannak zung hna nih an hlonhmi thilri hna, hmunthur hna le vawleicung ramkip ah an hmanlio mi rungrul thahnak sii hna, datthil-chemical thilri hna kha tiva le tidil hna ah an hlonh ruangah dinti cu a thurhhnawm ter.

30. Tithiang tifim hmuhnak pehzulhin a zorlio caan, hmun chuekhat ah ti a har lio caan hna ah ti hmuhkhawhnak tihram hna kha pumpak ngeihmi ah an ser i an zuarhmi hna zong kha kan hmuh hna. 

Minung kan nunnak caah a biapibik in a herhmi tithiang tifim hmuhnak cu mikip caah hmuh awk a tlakmi a hrampi asimi minung tinvo pakhat asi i adang nuhrin covo hmuhkhawhnak caah a hram konglam zong asi ve. 

Vawlei pumpi cu alkhawh lomi minung huham he aatlak te um in nungkhawhnak minung nawlngeihnak kha sifah harsatmi hna caah hmuhkhawh dingin rian`tuannak a umlo caah vawlei pumpi cu sifakmi hna cungah zatlang nunphung he pehtlaimi lei an ba tiah kan ti khawh.

Hi leibatmi chamkhawhnak caah tithiang tifim hmuhkhawhnak le mi sifak hna caah ngandamnak bawmhchanhnak caah phaisa khonnak le bawmhawk tangka tamdeuh chiahnak in a cheuchum chamkhawh asi. 

Sihmanhsehlaw dinti semrelnak ngeih loin, sawksawmnak hna kha ti a tamnak hmun asimi a rummi ram hna le a `thancho lio mi ram vialte ah kan hmuh. Hi thil umtuning kha kan zoh ahcun ti hmuhnak aa ningcang lonak le ti sawksamnak umtuning i achiahru mi a hnu pehzulh thil umtuning hna kha biapi in chiahnak a tlawm caah tithiang tifim hmuhnak harnak piahtana he pehtlai mi fimchimhnak prokarem hna le nunphung ziaza tlaihkhipnak a herhnak kong kha a langhter. 
    
31.    Ti a harnak cu ti kha aa bochan mi thilri hna le didin rawl hna aman kainak leiah hmai a hoihter khawh. Thiamsang hna cekhlat ralrin peknak ningin hi harnak piahtana fianternak caah biapi in rian`tuannak a umlo ahcun kumhrabu tlawmpal chungah ti harnak cu fakpiin tonkhawh asi tiah ralrin peknak bia a chim.

Kokek pawngkam rawhralnak ral kha minung nuai tampi hna nih tonkhawh asi. Ruahawk dang pakhat cu ram tampi hna nih forhin an `tuancio mi thanchonak lei rian`tuannak cheukhat cu ti hmuhnak le hmannak an tlaihkhip caah hi kumhrabu hmanh ahhin hi harnak piahtana he pehtlaih in a hak a renghmi thil umtuning he tonkhawhnak lam kan ngei.