Tikhal Tlang Hna An Titnak (Kokek Pawngkam)

KHUACAAN A LINHNAK I PENNAK
24. Khuacaan a linhnak cu carbon dat i heernak kha a chuahter. Cucu pehnak luat khawhlo i heernak kha a si ter i, thil sining a zualter deuh hnuah minung nih a biapi in a herhbik mi dinti bantuk hmuhnak kha a khonden i a linhnak hmun i thlai rawl chuahnak le thil ti khawhnak thazaang hna kha a hliamter i vawleicung um nunnak ngei a phun cheukhat hna caah cimitnak tiangin a chuahter te lai.

TIKHAL TLANG HNA AN TITNAK

Vawlei a dengbik vawlei aa mernak hmun le a sangmi tlangthluan hna in tikhal hna khuacaan a linh caah a ti in a titnak ruangah `tihnung ral a tammi methene dat chuahternak leiah hmai  a hoi i, tikhal hna tang ah aa phummi nunnak ngei saram hna i ruhro hna an langh`than i an thut, an man, an rawhnak hna ruangah carbon dioxide chuahternak a karhchin te lai.

Thil sining a chiatter chin mi konglam pakhat cu khuacaan thlennak sining kha a tlaihkhip piak mi a linhnak hmun in tupi hna an lohtlaunak ruangah asi.

Carbon dioxide dat hna ruangah thli thurhnawmhnak a tamchin tikah rili tipi thuamthum ti chungah Acid dat an tit in a lut ruangah rili chung i a ummi nunnak ngei saram hna le rili i eiawk rawl hna kha a khonden.

Hi thil sining ningin  a pehzulh  ahcun hi kumzabu a donghhlan ah a fakmi khuacaan thlennak hna le khahlan i kan rak tong ballo mi a nganmi kokek pawngkam rawhralnak le minung dihlak caah thinphan awk asimi a hnuzulh thil si ningcang hna he kan tonte hna lai.

Vawleicung milu cheuli cheukhat cu rilikam hna he a naihnak hmunah an um i khualipi tampi hna cu tiva, rilikam hna ah an um caah tipi thuamthum rili tihmai tlawmpal a rak kai ahcun cuka i minung hna caah `thalo ngaiin `tih a nung lai i a chiahru ngaimi siningcang hna kha a chuahter te lai

25. Khuacaan aa thlennak cu vawleicung huap pehtlaih mi harnak piahtana asi i, pawngkam siningcang, zatlang nunphung, `thanchonak, ramkhel le vawlei chungchuak thilri `thenphawtnak tiah a kakip in khonden sunghnak a chuahter.

Cucu nihin minung nih kan tonmi a nganbik zuamcawhnak asi. Achiabik a hnuzulh sining hna kha a ralai mi kumhrabu hna ahkhin a `thanchoka mi ram hna nih fakpiin an ton telai mi asi. 

Sifak harsa mi tampi hna cu khuacaan a linhnak dan a intuar mi hmunah an um hna i an pawcawmnak rian cu a rawhral rihlo mi kokek vawlei chungchuak thilri hna le kokek pawngkam hrambunh mi cinthlaknak, sa`il zuatnak, ngatlaihnak le tupi rian`tuannak hna hrambunh in an `tuan an ei an um hna.

Annih cu `thanchonak rian dangdang `tuannak an thiamlo, khuacaan aa thlennak le kokek ral a tlunlio caan hna ah rian`tuannak phundang `tuan dingah tangka khonnak an ngeilo i an caah zatlang nunphung le bawmhchanhnak le nunnak humhimnak caah aamahkhannak hna cu tahnak pakhat tiang lawng an cohlan khawh mi asi.

Tahchunnak kan chim ahcun saram hna cu khuacaan a zualchinnak, dinti an harnak hna ruangah an um, an in khawhlo tikah; ti`tha, ram `thatnak hmunah an i `thial ko lai. Hi siningcang a peh cu misifak hna caah rian`tuan, eidinnak kha a khonden. Cutikah misifak hna cu hmailei caan an fale caah aamahkhaannak umloin an chuahkehnak hmun kha kaltak in hmunthar le ramthar ah an chuahtak cio hna.

Kokek pawngkam rawhnak ruangah sifah harsat dirhmun phanhnak hna in luat awkah hmunthar ramthar lei ah aa `thialmi, a zaammi hna milu cu thinphan awk taktak in an tamtuk hringhran.

Cubantuk mi hna kha vawleicung ramkip phu hna nih harnak tong `thialkam hna tiah an fehter piak hna lo. Annih cu upadi ningin zeibantuk khamhnak le zohkhenhnak kha an ngeilo i, an rak chuahtakmi hmun i an rak `tuanmi rian hna zong kha kutlawng in an sunghtak dih hna.

Ngaihchiat awk ngai asimi cu khabantuk harnak a tongmi hna cungah zawnruahnak langhter loin, mah he aa pehtlailo tin zeirellonak kha kan hmuh. Hibantuk siningcang kha vawleicung pumpi ah kan hmuh hna.

Kannih kan unau kan farle hna nih an toncuahmah mi harsatnak hna cungah zaangfah zawnruahnak langhter awk rian tlolhnak cu ramkip i a hram asimi nunnak aakhat mi minung, nu le pa hna caah `tuanvo lakthiamnak lungthin kha minung nih an sunghnak tehte asi..