Vawlei Kan Nuu

Asissi Khua in St. Francis

10. Keimah kha Rome khua Bishop le Pope ah an rak ka thimlio ah, ruahnak `tha`tha le lam hmuhsaknak pek i zohkhenh ding tiah min pekmi iang a ngei i hmailei nornak a ka pekmi mi thianghlim St. Francis leikap ah ka ruahnak phanh loin hi cathluan hi `tial ka duh lo.

St. Francis cu hliam le rawh fawimi kokek pawngkam kha `thatein a zohkhenh i a tling cikcek mi kokek pawngkam kha a thang`that i nuamtein a rak ummi zohkhenh awktlak sinak a rak langhtertu asi tiah ka zumh ka cohlan taktak mipa asi.

St. Francis cu kokek pawngkam zohkhenh kilvennak kong a kawl a cawng mipa, zohkhenh kilvennak leikap ah rian`tuantu hna kha a zohkhenh a kilven a khamhtu mithiang asi i biaknak phunkip in mi tampi nih an dawt i upat hmaizah a tongmi mithiang zong asi.

St. Francis cu Pathian sermi thil zeizongte le mi sifak hna le hnonhlawt mi vialte hna kha thlaihchan in a dawtupa asi. Amah cu, a lunglawmh tha nuamnak, sianngai in a nunnak pek i mi ca `thathnemnak caah pekchanh in a `tuannak, hlangfangin a chimrel i tluantlam duhtlai mi lungthin a ngeih caah mi tampi nih upat hmaizahnak kha a rak co.

Amah cu biatak (Pathian) le aa zuammi asi bangin sifak ngai le dinfel tein a rak um i, Pathian he siseh, kokek pawngkam he siseh, nunning aa khatmi, minung khat le khat hna he siseh, amah a thinlung put he siseh, hnatlak tein a rak um Pathian biak khualtlawng mi pakhat zong a rak si.

Amah cu kokek pawngkam kha `thatein zohfelnak, mi sifak hna caah aa buaktlak ningcangte si ding i zuam in rian`tuannak le minung hna thinlung chungah lungnuam tein chiahnak hna cu `henkhawh asilo mi `temnak zunhri bantukin pehtlaihnak a ngei tiah tehte a kan hmuhsak.

11. St. Francis cu kokek pawngkam kong kha kakipin tlinglakte kawl duh asi ahcun kanan thiannak, saram lei thiannak biafang biathuk hna kha lohn hnu ah a dal dang hna zong cawnkhawhnak innka aa hung i hlangfang tein cawn le kawl asi i minung tling taktak sinakin um khawhnak cu zeikhidah a chimduh timi a chung taktak hmuhkhawhnak caah a kan bawmh.

Kannih cu mi zeimaw he kan i duhdawt tikah asi tawn ning bantukin, Francis cu ‘Nica pi, Thlapa nu le a hmebik thilnung pakhat kha dengteo in a zoh hna tikah a thinlung i suum kholoin, hla fungkhat a phanh i, amah i thang`thatnak hla a saknak ah a dang thilnung vialte hna zong kha lemsoi in a hruai khawh hna.

Amah cu thilnung vialte hna he biachim in a komh hna i pangpar kung hna hmanh kha phung a rak chim hna i cu hna kha theih hngalhnak thluak a ngeimi thilnung hna bantuk Pathian kha thang`that ve awk ah a rak sawm tum hna. Amah cu pawngkam vawlei he lehrulhnak ah mifim thiamsang hna thang`that mi pungsan asilo, `hanchonak tuaktan pungsan zong siloin, amah caah thilnung vialte hna cu dawtnak zunhri in `emmi kan farno hna bangin a chiah hna? Cucaah amah cu thilnung vialte hna kha zohkhenh ding `uanvo ka ngei tiah a thinlung ah a rak chuak.

St. Francis a zultu taktak asimi mithiang St.Bonaventure nih a sayapa kong a chimnak ah, amah cu thilnung vialte an chuahnak hrampi asimi kong kha ruahchih in khua a ruatnak in Pathian cung `ihzah upat deuhnak le a rak khah hnuah, thilnung vialte hna kha zeitluk in an hmet zongah, ka nau, ka nau nu tiin a rak kawh tawn hna.

Hitiin ruahnak hna cu sullam ngeilo mi duhnak zatlan pakhat asi tiah a ruat in fawi le bai in hnon awk aatlak lo. A ruang cu hiabantuk ruahnak cu mi hna i ziaza kha lam thiampiaknak, biakhiah piaknak he a pehtlaih caah asi.

Kannih cu kokek vawlei le pawngkam vawlei kha kan zohchih tikah Pathian nih asermi vawlei i thang`that tlak asinak, khuaruahhar asinak hna kha langfang tein zohchihnak aa tello ahcun kannih cu, hi vawlei he pehtlaihnak kha kan langhternak ah annih an i dawtnak kong unau `tafar bantukin chiah mi biafang hman asilo ahcun vawlei cungah kan ngeihmi lungput cu saya le bawi hna bantuk, sawksam mi hna bantuk, caantawite lawng mah ca `thathnemnak a kawl mi caah zohkhenh tlangtlak piaktu ngeilo, zaangfah zawnruahnak a ngeilo mi, a hrawktu hna an si lai.

Tahchunhnak ningin kan chim ahcun kannih cu vawleicung i a ummi thilnung vialte hna kha kannih he duhtlai tein kan i komh tiah kan ruah cio asi ahcun tuahtan in hmannak le ralrinnak hna cu amah tein chuak ding mi asi ko.

St. Francis nih sifak ngaiin a umnak, fakpin semrel aa suumnak hna cu biatak aa zuammi hna caah a par paruan duhherhnak men siloin, a hrampi in remh duhnak tuah ningcang pakhat asi. Thilri hna kha mi hna caah mah duhning in sawksam ding mi thilri hna, minung uknak tangah chiah dingmi thil hna tiah lungput ngeih dingin alnak asi.