Vawleipi

Vawleipi, Nu

                   Voikhat lio ah keimah nih duhtlai a simi, tthathnemnak a pemi, tinvo tlingtein a ka pe mi " Nu (Mother)" karak ngeih bal. Mah mu i tampi hlawhtlinnak thawngin ci tampi a chuahter caah athongsang renglo fanu / pa hna hrinpiak hna. Mah nu a min cu " Vawleipi" tiah an auh i a fanu le a fapa hna cu " Pa le Nu" ( Man & Woman ) hna an si. Amah cu fale hna kha a dawttuk hna caah a kiki i a thiangmi, a fimmi dinti ( tifim dinti thiang), a hang atammi thingtlai tthattha hna, zaunak caah a thhami, a nem i a hinghno mi ram kung hna kha, ni le thla zeitik caan paoh ah a rak pek lengmang hna.

                  Kan nu Vawlei i fale a sini minung hna cu, an ngakchiat lio ahcun an nu cungah dawtnak an rak ngeih ngaingai. Annih nih an nu ( Vawlei) kha kut, ke zei hmanh i hruk lo, thlaikawlawng piin an rak tuamhlawm hna. Anih cu khuacaan ningin, tthal, khuasik, fur chuak thlairawl phungtling kha an khawmh in a sunpar taktakmi , rumra ngei ngaimi nuamhnak puai phuntling kha an rak tuah khawh caah an nu" Vawleipi" cungah an i lawmh i an raktling tik hringhran. Ngakchia no ( bawhte) bantuk in an thinlung put a rak thianghlim tuk caah an leikuang hna, an inn hna le Biakinn chung hna ah an nu " Vawlei" sin lunglawmh thlacamnak, thangtthatnak, upat pek biaknak puai hna an raktuah.

                 Sihmanhsehlaw, Vawleipi hmunkipi a fale hna cu fimnak phunphun an cawng hna i fimttiam thiamsang an i chuah le cang ka in an nu cung pehtlaihnak le an komhning cu nikhat hnu nikkhat dai zirziar in a zor a ttumchuk chin lengmang. A hnu bik ahcun an nu Vawlei i zaangfah zawnruahnak, bawmhchanhnak hna, sian nak le ttathnem lunglawmhter nak hna vialte kha an philh dih. An puai ni hna le puai tuahnak hna vialte cu an rak ngol thluahmah cung. An thlacamnak cu an hngawng ah a ra tap cang. Annih upatpek biak( pumhnak) nak hna zong an philh dih cang. Kha hlan i puai nganpipi an rak tuah tawn mi te hna, an thlacamnak mi te hna, upat pek an rak biakmi hna kha an lung a tling ti lo i an duh ti lo. Annih cu duhtlai mi mifim thiamsang pakhatte dir hmun ah an phnah cang zaat in a ding lo zertiam nak an nu Vawlei i a ttangkha dihhlo in an suur cang. Hrin rih lomi fale hna caah tiah an nu ( Vawlei) nih a thuh piak le anganh piakmi vialte kha tthihphaih in an chuh cio cang. Ahnu bik ahcun a parpalek phangh tiang a phanh cangmi minung an sizaat in upat awk a tlak i zaangfah zawnruahnak a ngeimi an nu ( Vawlei) cungah an ruah ning an lungput aa dang dih cang. An nu Vawleipi kha a tei kho dingmi zuamcahtu ah an ruah can.

                  Ramlak saram hna kha rap chiah in an tlaih hna i an tthawl hna. An nu nih a ngeihmi dihlak kha hakkanh ngai in an phoihhlo, an hawh i an i laak cang. Mahnu i a fale hna cu hruhru hrangtrang in an nu nih aa hrukmi, aa dawt ngaimi Angki fual i aa dawtnak vialte kha an phoih an hawh i an nu kha thurhnawm dingmi an tuah. Vawlei cung i thiamsang hna, khuaruah tuaktannak lei thiamsang hna nih, " Ahnu bik ahcun Vawlei kha kan tei cnag, kokek biathlithup hna zong kha kan theih khawh cang; kokek phungningin a cangmi thil hna i ttih nun a simi hna, pupa zumhnak i hruhchihnak hna, tiin ziamhnak a lo mi sinak in kan luatkhawh cang tiah a tu le a tu an aupi cang hna. Atu ahcun, kannih cu kan rum kan ngei i, a ceu, a dei mi hmailei caannih kannih kha a kan hngah cang. Kan nih cu a ho sin hmanh ah lunglawmh thlacamnak, upat pek in biaknak tuah kan herh ti lo," tiah kan aupi khawh cang.

                                             Sihmanhsehlaw, kan Nu " Vawleipa" hi umhlah seh law kan nung kho lai maw?     By Norbert Caling