Mithiang Anthony (Egypt)

Mithiang Antony

Ṭhetse ram,lamhaar zateih phu a rak dirhtu, zateih phu uktu mithiang Anthony cu Izipt ram ah kum 251 AD ah a rak chuak. A nu le a pa an thih tikah Anthony cu inn le lo, dum, vawlei, rothil le a farnu zohkhenh kha ṭtuanvo a lak. Kum 20 a si ah Missa chung i an rel mi Bible “Mt. 19:21” i mitling si na duh ahcun, va kal law na ngeihmi thil vialte kha va zuar hna. Cun tangka na hmuhmi kha mi sifak hna kha va pe hna. Cuticun vancung khua ah chawva na ngei lai, cun ra law rak ka zul,” timi Bible caang kha a lungah a rak campeng. Cucaah a thilri hna kha a zuar i a pek hna. A rauh hlanah, Mt. 6:31 chung i “Khuazei in dah ka ei awk ka rawl cu ka hmuh lai, ka hnipuan cu ka hmuh lai, tiah lungrethei in um hlah ngat u!” timi Bible caang a theih ṭthan hoi tikah a tangmi a thilri vialte kha a ṭthenh dih hna i a farnu kha Sister sianginn a kaiter hnu ah ṭthetse ram ah a kal i zateih aa hruk. Anthony kha khuachia nih sahrang bantukin siseh, A hrut ngaimi nu in siseh, a thilri hna in vawlei ah tuah khawhmi ṭthatnak hna kha siseh, a hmuhsak i tukforhnak a tuah. Asinain thlacamnak le rawlulhnak in cu tukforhnak cu a rak tei khawh.
Mi tampi nih cun Thlarau lei ruahnak kha amah sinah an rak hal i a hnuzul tampi nih a sinah an rak panh. Cucaah Anthony cu a hnuzul hna he hmasabik Khrihfa zateih phu an rak dirh. Anthony nih a hnuzul hna kha, nihin zanlei ah a thi hnga mi bantuk, zancaan ah thaizing niceu ṭtha a hmu kho lai lomi bantukin siseh, an tuahsernak vialte kha a hnubik caanṭtha tiah ruah i a ṭthabikin ṭtuan le nun dingah a cawnpiak hna. AD 337 kum ah Rome Siangpahrang Constantine nih Anthony sinah na pum kha ka thlacamnak ah ka pekchanh tiah ca a kuat. A hnuzul pawl an khuaruah a har dih kha a hmuh hna tikah, “Minung fa a simi Siangpahrang nih kan sin i ca a ṭtial mi ah nan khuaruahhar hlahseh, Pathian cu a Fapa ngeihchunte hmangin kannih sinah bia a chimnak kongtu ah nan khuaruahhar deuh seh” tiah a ti hna.
AD 355 kum ah a hawi a simi St. Athanasius nawlnak in Alexandria khua ah a kal i “Jesuh cu Pathian a silo, minung men a si” timi a palhmi zumhnak tette he cawnpiaknak, ṭthawnnak langhternak hna chungin mitampi zumhnak kha a fehter hna. Cu khua uktu nih saupi cam dingin a nawlnak kha Anthony nih “Nga cu ti he aa ṭhen ahcun a nun khawh lo bantukin zateih zong pakhat lawng um i biatak i zuam lo ahcun a rawk kho” tiah a leh.
AD 356 kum ah Anthony cu a thih lai ni tlawmpal ah a hnuzul pahnih a auh hna i tlangcung a kingnak hmunah rak vui te dingin bia a cah tak hna. Ahnubik ahcun “Ka fadawt hna nan kut kan tlaih hna, kan i ṭthen cang hna lai. Nanmah he ka um ti lai lo” tiah a ti tak hna. Khuachia tukforhnak hriamnam a simi sahrang hna kha fimzer tein a rak komh khawhnak fimthiamnak ruangah St. Anthony cu lothlo le innzuat saram hna kilven zohkhenhtu mithiang pakhat sinak an pek.

Add new comment

5 + 3 =