Mithiang Clare

11^th August

ST. CLARE (1193-1253)

(NUNGAK THIANG)

            Poor Clares phu kha a thawktu mithiang Clare cu 1193 kum ah Assisi khua ah phunsang chungkhar in a chuak. Kum 19 a ti ah St. Francis i ulhcan he pehtlaimi phungchim bia pakhat kha a duhtuk caah Portiuncula khua ah amah le amah kha Jesuh Khrih sinah pumpek i hlut dingah a thlitein a kal. Francis nih a thildawh hna le a sau ngaimi a sam hna kha a tanpiak dih hnuah Bastia khua i a ummi Benedine Sister Sianginn ah a chiah. A chungkhar le a rualchan hna nih inn lei rak kir`than dingah an chimh tikah Clare cu Biak`theng kha aa tlaih pahin keimah cu Jesuh Khrih lengin aho vahmanh ka ngei lai lo tiah a ti hna. Can a relrem tikah a dang nungak pawl hna he a thianghlimmi Sister buthar pakhat kha St. Domiano Sianginn pawngah an dirh.

            Poor Clare tiin an theih hngalhmi annih cu sifahinnak le a harmi sualngaihchihnak kha an cawn. Annih cu phanah danh loin tlonlennak, nifatein semrelnak hna kha an tuah i aho he hmanh an i chawn lo. Tuahawk a simi le van`hatnak a simi calawng ah bia an chim. 1228 kum ah Pope Gregory IX nih Clare kha a harmi sifahinnak biakamnak in luatnak nawl a pek tikah amah nih “Keimah cu ka sualnak in luat awk herh ko hmanhsehlaw Jesuh Khrih hnuzulnak in luat awk cu ka herh lo,” tiah a rak leh. Cu a si caah Pope nih anmah kha Privitegium Pauperitatis a pek hna. Cu caah ahohmanh nih an ngeihmi chawva kha cohlan (ilak) dingah an forh kho hna lo. 1224 kum ah Frederick II i ralkap hna cu Assisi khua hrawh awkah le thliri chuh dingah an rak ra. Clare nih a thiangmi Sarcament kha aa tlaih i anmah ton dingah a va kal. Chikhatte ah khuaruah har awk le `ihnung a simi thil pakhat nih ral hna kha a tlaihkhih hna. Cucaah ral hna cu khua chungah ahohmanh harnak le sifahnak pekloin an zamtak dih hna. 1253 kum a thih laite ah, Clare nih “Keimah kha na ka ser caah, Maw … Pathian, na min thang`hatnak um ko seh” tiah a chimtak.