Mithiang Joseph

Mithiang JOSEPH

Ngaknu thiang Mary a Va, Bawi Jesuh cawmtu le zohkhenh tu mithiang Joseph cu David hrinsor pakhat asi. Joseph cu Nazareth khua ah a rak um i lettamaa rian a tuanmi a si. Mary he khan an i ham i an i um hlan ah Mary nau a pawi kha a hngalh. Joseph cu thil a hman ning in tuah a duh zungzal mi a si; sihmansehlaw Mary cu zapi hmai ah ningzah ter a duh lo caah an i hamnak kha a thlite in ka let lai, tiah khua a ruat lengmang.

Cu kong a ruah lengmang lio ah zankhat cu a mang ah Bawipa vancungmi pakhat a sinah a lang i, “David tefa Joseph, Mary hi na nupi ca i lak awk ah tih hlah. Zeicahtiah fa a pawi mi hi Thiang Thlarau thawngin a si. Fapa a hrin lai i a min ah Jesuh na sak lai- zeicahtiah a mi kha an sualnak chungin a khamh hna lai,”(Matt 1:20-21)tiah a rak ti. Cucaah Joseph cu a hun i hlauh tikah Baipa vancung mi nih a rak chimh bang khan a tuah i Mary kha a thit. Bawipa Pathian bia a ngai mi a si caah Mary kha a cohlan. A upat i a zohkhenh. Bawipa Pathian bia a ngai mi paoh paoh nih Mary hi kan cohlan ve hrimhrim ding a si.

                Milu relnak cazin khumh dingin Bethlehem ah an kal lioah Mary nih cun khamhtu Messiah kha arak hrin. Cun cuarpartan nak tuah ni, niriat tlin ni ah mithiang Joseph nih cun afapa kha “Jesuh” tiah min a sak. Mifim pathum hna zong nih, bawhte Jesuh kha an rak biak. Mifim hna an um nak ram an kir hnu ah Joseph nih cun mang a manh than.

Bawipa vancungmi pakhat cu Joseph sinah khan  a mang ah a lang than i, “Tho law, ngakchia le a nu kha I kalpi hna law Izipt ram ah va zam u. Cun chuak cang u, kan ti hna hlantiang cuka ah cun va um u. Herod nih hin ngakchia hi thah awk ah a kawl lai” tiah a ti (Matt 2:13).

Mitiang Joseph hruainak le cawnpiaknak thawngin Jesuh cu atlingmi fimnak le thiamnak kha a ngei. Joseph cu Bupi nih thihtha (phulthih) in thih khawh nak hnga caah bawmhchanhtu mithiag a si tiah cawnpiaknak bia an fehter. Zeicahtiah Nu Mary le Jesuh bawmhnak thawngin lungdai tein le zumhfek tein arak thih caah asi. Tuanbia roca ningin Joseph cu Jesuh phung achim hlan deuh March (19) ni ah arak thi ti asi. Nu Mary le Jesuh caah a nunnak vialte aa pekchanh dih. Vawleicung he pehtlaimi Bupi kilveng tu mithiang sinak zong Bupi nih afehter. Amah min bochan in amah sinah bawmh a hal mi paoh kha a bawm zungzal hna tu mithiang asi fawn.