Mithiang Martin

November 11

TOURS KHUAMI ST. MARTIN

(BISHOP)

            Ralkap hna zohkhenhtu mithiang St. Martin cu 316 kum, Hungary ram Pannomia khua ah Catholic (RC) asilo mi budang nu le pa nih an hrin. Rome cozah bawi pakhat i fapa a si bantukin ralkap chungah hramhram in an luhter. Kum 23 a si ah, Amiens i sakhaan an rak um lioah a khua a siktuk caah a thi dengmang cangmi halvaak pakhat kha kutka pawngah a hmuh. Chikhat lioah a ralkap angki kha cheuhnih ah a cheu i cheukhat kha a pekcolh. Cuzan a it tikah Martin cu a mang ah Jesuh Bawipa nih cu angki aa hrukkha a hmuh. Cu thawkin ralkap rian kaltak in Pathian rian tu kha `tuan dingah a lungah a chiah peng. Asinain Barbarian mi`thalo ral pawl nih an raktuk laite caan a si lengah Siangpahrang Julian zong nih hi a ruahnak cu ralchiatmi tuah sernak tiah a sullam a hmuhpiak caah Martin nih “Jesuh Khrih min in hriamnam i tlailoin ral chungah dirding le ral hna sinah keimah pakhatte lawng in tuk dingin timhcia ka si ko,” tiah a rak leh. Cuhnu nikhat ah ral hna nih daihnak lak dingin khuaruahhar awkin an rak chimh hna. Cutikah Martin cu ralkap rian in chuak le tipil innak nawl a rak hmuh.

            A chungkhar hna kha thawng`tha a chimh hna hnuah Liguge ah Zateik aa hruk. Kum 371 ah Tour khua Bishop cannak an pek. Martin nih Tuukhal `tha a sinak kha a langhter khawh. Zateik Sianginn a sak hleiah Siangbawi hna zongkha ca a chimh hna i khuate fa hna i thlennak kha fakpiin aa zuam. Amah cu Biaknak dang hna i biak`theng le a thiangmi thingkung hna kha a hrawhpiak hna tiah zumh a rak si. A nunnak a hnubik caanah a kut pahnih kha vanah a thlir peng. Na sir in na ih ahcun na siarem deuh lai a timi hna kha, “Vawlei zohnak in Vancung tukha ka zoh ter u,” tiah a ti hna. Cuhnuah a pawng i khuachia a dirkha a hmuhtikah, “Nang, thidawp a duhmipa, kei cu na rawl ka si lo, Nangmah na ei awk rawl ka si kho lo,” tiah chim buin kum 397 ah a thi, tiah an ti.