Mithiang Perpetua le Felicity

SS. PERPETUA & FELICITY(+203, Martyr)

           Cartheik khua in martyr hna a simi St. Perpetua le Fecility tuanbia bantuk an konglam cu hmailei kan fale Khrihfa hna lungthin phanter in a um. Cartheik khua i ngaknu thiang asi mi Perpetua (kum 22) cu fapa pakhat a ngeimi asi i Fecility cu kum note sin um a si. Cu lioah pum lawng loin a um lio caan zong asi. Kum 203, Khrihfa hna a rak hremmi Seftimus Severus caan lio ah annih pahnih cu Satunius, Socondulus le Rebocatus timi biaknak ah luh aa timmi (3) hna he an rak tlaih hna. Anmah he hmunkhat ah lungtling tein thongchung luh aa tim ve mi Pastor Saturus nih an dihlak in tipilnak a rak pek hna.

            Perpetua nih a fapate kha Budang asimi pa kut ah a rak pektak. A pa nih fak piin a nawl ko buin a zumhnak kha a hlaw lo. Felicity cu thong chungah fa a hrin i a hawi Khrihfa hna nih a fapa kha an cawmpiak. Biaceihtu bawi hmai ah an zumhnak kha an phuan hnu ah sahrang kua chungah thlak dingin bia an khiahpiak hna. Annih puai zohnak tual (amphitheates) chungah Salm hlasak pah le, pathum cu pawte le vom nih a cheucheu in sehnak an in. Perpertua le Fecility hna tu cu Siahrang hna hmai ah kutsih in an dir ko. Siahrang hna nih voitamtuk in an suk hna caah hmatam ngai an put i an hma cu ṭih a nung ngaingai. Ahnubik ah puai zohnak hmun laifang ah an put hna i namtawng in an thah beh hna. Perpetua cu amah sam dingin a kut ather mi mithatpa kut kha a tlaih i nam kha a hngawng cungah a khinh piak.