Sualhram Ngei Loin a Semmi Bawi Nu Mary

Sualhram Ngei loin a Semmi

December 8

NU MARY SUALHRAM NGEILO IN A SEMNAK

(Immaculate Conception)

            Minung cungah aa neh mi sualhrampi in luatter dingin vawleicung ah a rak ra hngami Jesuh Khrih i khamhnak rian ah i telve ding caah zungzal nungmi Pathian sinin a hleikhun thluachuah pakhatte thawngin a thianghlim mi nungak thiang Mary cu; sualhram ngei loin a rak sem ti kha Bupi nih a cohlan. Hi cawnpiaknak cu Bible le Bupi nunphung tuanbia cungah hrambunh mi a si tiah Pius IX nih cafang in langhter khawh lo tiangin a thiangtuk mi Pathian (The bull Ineffabilis Deus) tiah 1854 kum, December thla ni (8) ah phungning in a fehter i a thanh. Nungak thiang Mary le Satan karlak i remlonak kong kha “Nangmah le nu cu nan i hua lai, a tefa le na tefa cu ral an si lai, Mi nih na lu kha rial an i zuam lai i nangnih a kedil kha cuk naa zuam ve lai,” tiah (Gen; 3:15) ah a hlanpi tein biathlam pekmi a rak um. Cu biathlam cu “Vancungmi nih Mary sinah thawng a thanhnak (Lk. 1:28) ah Vancungmi kha a sinah cun a ra i, “Nacung ah daihnak um koseh. Bawipa cu na sinah a um i thluachuahnak tampi in an pek lai,” tiah fektein a dirkamh. Elizaberth nih Nu Mary a biak chawnhnak, (Lk. 1:42) “Nangmah cu nu vialte lakah thluachuakbik nu na si,” a timi nih hin a fehter `than rih. Chan laifang ah Nu Mary sualhram ngeilo in a semnak biathuk hi Bible lei thiamsang hna karlakah i alawk bia pakhat in a rak um. Bernard le Aguinas bantuk minthang ngaimi a dang biaknak lei thiamsang hna le St. Dominic zateik phu nih Nu Mary cu sualhram he a rak i sem tiah an rak ruah. Anmah ruahdamhnak he ralchanh in Duns Scoto bantuk St. Francis Zateik phu tu nihcun Khrih Jesuh a nu Mary cu sualnak a pelte hmanh a ngei kholo tiah an rak ruahdamh. 1854 kumah Pope Pius (9) nak nih hi bia-alnak he pehtlai in “Vawleicung pumpi he pehtlaimi Jesuh khamhnak rian ah aa tel vemi Nu Mary a semnak cu Pathian nu sinak in aa telmi a si caah sualhram ngeilo in a semmi a si,” tiah a thanh hnu lawngah bia-alnak cu a dongh. Hi cawnpiaknak he pehtlaimi sullam khiahnak kha 1858 kum Laurdes i langhnak a rak tuahmi Nu Mary biathlam in hmuhmi a si. Cu hmuhsaknak a rak hmuhmi Barnodette nih Nu kha a min a vun hal tikah Nu nih Keimah cu “Sualhram ngeilo in a semmi nu ka si” tiah a rak leh.

Add new comment

2 + 0 =