Ṭhatnak Thilnu maw Chitnak Thilnu dah?

Jesuh nih hi vawlei cung a rak um lio ah Vancung Pennak kong he pehtlai a rak cawnpiak hna nak kong kha kan Bible cathiang chungah bianabia a phunphun in hmun tampi ah hmuh khawh a si. Nihin ni caah Bupi nih ruah ṭi dingin le thazang laak ṭi dingin a kan thimpiakmi cathiang cu Luke 13:18-21 a si i Vancung Pennak kong he pehtlai in Jesuh nih a cawnpiak hna nak kong ṭhiamṭhiam a si. 

Jesuh nih a cawnpiak nak a ngaitu hna kha, “Pathian Pennak hi zei he dah aa lawh? Zei he dah ka tahchunh khawh lai?” tiin bia a hal hna. Sihmanhsehlaw biahalnak cu amah lila nih lehnak a tuah ṭhan ko. “Mipa nih a lo ah a tuhmi anṭam ci he aa lo; anṭam cu a hung ṭhang i thingkung ah a cang i a nge ah khan vate nih bu an sak,” tiah a ti.   

Jesuh nih aa thawh ṭhan i, “Pathian Pennak cu zei he dah ka tahchunh lai? Minu nih thilnu aa lak i changvut rel khat chungah a phulh i cu thilnu nih cun changvut cu a thawhter dih. Cu thilnu bantuk cu a si,” tiah a ti. Bawipa nih hi cawnpiaknak hmangin a ngaitu (nang le kei zong telh in) hna sinah zei khi dah a bikin a kan chimh duh mi a si hnga? 

Vawlei cung kan um lio ah hin ṭhatnak kan tuahmi ah siseh, a thianghlimmi nunzia in kan nunnak ah siseh thilnu bangin kan si cio ding hi a kan duh piak mi a si. Ṭhatnak tuah kha a let in tuah lengmang ding a si ti duhnak a si. Khrihfa kan sinak ah hin midang hna sinah nikhat hnu nikhat a ṭha chinchin mi Khrihfa kan si ding hi a duh mi a si. Thilnu nih chang a karhter bangin hi vawlei cung kan nun caan te ah hin Pathian dawtnak kha mikip nih an cohlaan khawhnak hnga ding caah mah pumpak hrimhrim nih thawk in a let in (karh chinchin in) chimphun ding le langhter ding a si. Ṭhatnak tuah timi cu aho paoh nih kan theihmi biafang a si ko (Romans 8:28; James 2:14; Matthew 5:16; Hebrews 10:24; Romans 9:11; Philippians 2:13; Titus 2:14). Mithiang Paul nih: “Kannih cu Pathian kutchuak kan si i Pathian nih thil ṭha tuah dingah a rak kan tinh bantukin Khrih he kan i pehtlaihnak thawngin thil ṭha cu kan tuah khawh nakhnga a kan ser ṭhanmi kan si,” tiah a ti (Eph 2:10).  

Pathian Pennak, Vancung Pennak cu pakhat cio kan sinah a um ko. Kan ṭhanter lai maw, kan zorter (tlauter) lai dah timi cu kanmah nawl a si ko. Ṭhatnak tuah maw kan i thim lai, hrawktu si dah kan i thim lai? Ṭhatnak thlinu maw kan si hna lai hrawktu thilnu dah kan si hna lai?