Ṭhatnak tuah kha a biapi mi a si ko

“Annih nih minung serchommi nawlbia kha Pathian nawlbia taktak bantukin mi an cawnpiak hna caah an ka biak hi an caah zeihmanh a ṭhahnem lo,” tiah a ti. (Mk 7:7)

Jesuh nih Farasi mi hna le phungbia cawnpiaktu saya hna kha nawlbia le phunglam hna lawng biatak tukin a chia mi an si caah a mawhchiat hna. Micheu cu mah nih tuah duh ṭung loin midang hna kha fial lawng a hmang mi kan um tawn. Cun cawnpiaktu cheukhat hna zong, Khrihfa hna sinah an cawnpiak hna ning khan a nung lomi le a zul lomi an um fawn. Kannih hna zong Farasi mi hna bangin a si kho mi kan si ve.

Nihin Missa raithawinak chungah kan relmi cathiang (Mark 7:1-13) nih hin Jesuh Khrih le Farasi mi hna sining le an nunzia aa dan ning kha fiang tein a langhter. Kan Bible cathiang chungah Jesuh Khrih kong he pehtlai in kan zoh tikah “a chim lawng chim loin tuahsernak ṭha zongin” lam ding lam hmaan a kan hmuhsak zungzal timi kha kan hmuh khawh. Kan nih Khrihfa mi hna sin zongin Jesuh Khrih muisam langh ding hrimhrim a si.

A caan ah cun kannih hna zong Farasi mi hna le phungbia cawnpiaktu saya hna bangin, mah nih tuah ṭung loin midang hna kha fial ding lawng khua a khang mi le aa timmi kan um tawn. Cun pakhat le pakhat i zumh lonak timi zawn zongah hin “a chim lawng chim in mah nih chim bangin tuah lo ruangah” a si deuh ṭheo tawn. 

Minung kan si caah phunglam hna le cawnpiak nak ṭha hna hi kan nunnak ah kan herh taktak ko hna. Sihmanhsehlaw hi phungbia hna le phunghram hna kha minung hna nak in a biapit deuhnak hmun ah kan chiah sual, kan ruah sual a si ahcun kan tuahsernak le kan thleihtleng dirhmun hi an palh cang, Pathian duh ning he zong aa ralchan cang timi kha theih ding a si. Bawipa Jesuh hrimhrim nih phunghram, phunglam hna nak in minung an biapit deuhnak kha hitin a langhter: “Sabbath cu minung caah pei ser a si cu, minung cu Sabbath caah ser an si ṭung lo,” tiah a ti(Mk 2:27).

Bia a chim lawng chim in mah chim ningin le cawnpiak ningin a zul lo, a tuah lomi kan si sual maw?