Ṭih hlah u. Vawlei cu ka tei cang. 

“Keimah ruangah mi kip nih an in huat hna lai. Sihmanhsehlaw nan lu cung samfa fa khat hmanh a tlau lai lo. Fek tein dir ko u, zeicahtiah hitihin pei nan nunnak cu nan khamh lai cu,” tiah a ti hna.(Lk 21:17-19)

Nihin Missa thawinak chungah kan rel thawngṭhabia (Lk 21:12-19) hi kan zoh, kan ruah a si ah cun ṭih a nung ngai mi a si. Jesuh nih a cawnpiaknak a ngai mi hna kha: “Hi thil vialte an tlun hlanah hin nannih cu tlaihkhih nan tong lai i hremnak nan ing lai; Pumhnak inn ah khan biaceih awkah an in chuahpi hna lai i thong ah an in thlak hna lai; keimah ruangah siangpahrang hna hmaiah le uktu bawi hna hmaiah an in chuahpi hna lai,” tiah a ti hna. Cun a chimchap mi cu: “Zeitindah kan i runvennak ding caah bia kan chim lai tiah a hlankan in nan lungre rak thei hlah u; zeicahtiah nan ral ahohmanh nih an in tei hna i an in al khawh hna nakhnga lo, bia le fimnak kha kan pek hna lai,” tiah a ti. Cun ralrin bia a chimh rihmi hna cu, “Nan nu le nan pa, nan u nan nau, nan sahlawh nan rualchan, nan hawi nan kom hna nih khan an in rawi hna lai i nannih lak i a cheukhat cu thahnak nan ing lai,” tiah a ti.

Zeibantuk harsatnak thil hna hmanh kha zultu hna nih tong ko hmanh hna sehlaw Jesuh nih  an thazang umnak hnga ding caah bia a chim mi cu: “Keimah ruangah mi kip nih an in huat hna lai. Sihmanhsehlaw nan lu cung samfa fa khat hmanh a tlau lai lo. Fek tein dir ko u, zeicahtiah hitihin pei nan nunnak cu nan khamh lai cu,” tiah a ti hna. Hitin Jesuh nih a chimmi nih hin kan thinphannak hna le kan lungretheihnak hna chungin lung daihnak a kan pek khawh taktak ko. 

Ruat ve hmanh. Lawmhnak, himnak le nunnak hmuh duh ah Khrihfa kan si hna i Jesuh cawnpiak nak hna kha kan cohlaan hna. Hitin kan um lio caan ah harsatnak ton ding a si tiah Jesuh a timi, a chimmi nih hin kan ngaih a chiaṭer sual maw; kan thin a phanter sual maw? Jesuh kan i thim a si ah cun vailam lam zulh ding a si timi cu kan cohlaan hrimhrim ding a si ko. Zeicahtiah cun “Nunnak” lam a si caah a si. Nunnak pek a kan duh ruangah cun pei Jesuh nih a hnu zulh dingin a kan sawm lengmang nak zong a si cu. 

Nihin kan relmi thawngṭhabia chungin Jesuh chimmi bia hna hi kan vawlei pi ah nifatin kan ton, kan theih,kan hmuh leng mang mi an si ko hna. Hmun tampi ah hramhram in an zumhnak ruangah hremnak a tong mi, thahnak a tong mi, muisam le sining aa lawh lo ruangah thleidannak a tong mi hna tiin tampi an um cio ko. Vawlei cung thawngpang kan rel tik paoh ah hin fahnak tonnak hna le hliamnak tonnak hna lawng te hmuh lengmang a si ko. 

Nihin thawngṭhabia nih a bik in a kan cawnpiak duhmi hi zeidah a si hnga? 

Khrihfa zumhnak cohlaan ruangah harsatnak hna le hremnak hna na ing bal ve cang hna maw? Hi vawlei cung kan nun caan a dih tikah cun Pathian cungah zumhawktlak tein kan rak nunnak hna nak in zeibantuk thil hna hmanh khi man an ngeih deuh kho te lai lo. 

Jesuh, Pathian cawnpiaknak kha kan zumhnak a dih a umnak in kan zulh zungzal ding a si. Zeicahtiah cun “Nannih nih keimah he nan i  pehnak thawngin lungdaihnak nan hmuh nakhnga, hihi kan chimh hna. Vawlei nih hin harnak an pek hna lai, sihmanhsehlaw ṭih hlah u. Vawlei cu ka tei cang,”(Jn 16:33) tiah a ti.