“Biakamnak nan tuah tikah chiatser biahrennak zeihmanh tuah hlah u”(Matt 5: 34)

Nihin ni kan theih hnga dingmi cathiang hna; (1Kgs 19:19-21, Matt 5:33-37) chungin ruah ti ka duh mi cu kan biakam nak hna hi zei dah an si timi a si. Elisha nih Elijah hnu a zulh tikah lunglawm tein a rianttuan nak caah a hman mi cawtum hna le a thilri hna kha a chiah tak dih hna i Bawipa fial mi rianttuan awk ah Elijah hnu a rak zulh.

Kan Bawipa Jesuh Khrih nih a zultu hna a rak kawh hna lio caan zongah cu bantuk thiamthiam in an rak si ve. Bawipa vancung a kai hnu, zultu hna sin Thiang Thlarau Pathian a rungtum hnu thawngttha an chim tikah Bawipa thawngttha a rak cohlang mi hna zong nih zeibantuk ttih phannak hmanh ngeihlo in phukhat te ah Pathian an rak bia ti hna. Siangpahrang nawl hmanh el ngam in Pathian duh ning in an rak nung hna. Siangpahrang nih a nawlbia chuah mi a zul duh lo mi hna a rak thahter hna zongah zeibantuk ttih phannak hmanh an rak ngei hna lo. Bawipa fial mi rian le thawngttha caah an nunnak hmanh lunglawm tein an rak pek sian. Keimah caah timi lungput an ngei ti hna lo (Act 4:32).

Bawipa nih a kan timi cu: “Biakamnak nan tuah tikah chiatser biahrennak zeihmanh tuah hlah u”(Matt 5: 34) ah a ti. Zeicah kan ti a si ah cun minung cu palhnak chungah a tla lengmang mi kan si caah a si. Kan tuah hnga ding mi cu a kan chimhmi le fial mi lawng hi tuah ding a si ko. Chiatser biahrennak tuah hlah u a kan ti a si ah cun tuah lo ding a si ko.

(1 Jn 4:8) “Pathian cu dawtnak a si” tiah a ti bantukin mithiang Paul zong nih dawtnak kong he pehtlai in (1 Cor 13) chungah tling ngai in a langhter ve. Kan nih cu chiatser biahrennak tuah in Khrihfa a lut mi kan si hna lo. Bawipa bia, a dawtnak kan zumh caah Khrihfa kan si hi a si. “Kan Bawipa Jesuh Khrih vel, Pa Pathian dawtnak le Thiang Thlarau he i hawikomhnak cu nan dihlak sinah um ko seh” (2 Cor 13:13) Amen.