“Keimah hi lam le biatak le nunnak ka si.”(Jn 14:6)

“Khuaruahhar lungrethei in um hlah u. Ka Pa kha zum u, keimah zong kha ka zum ve u. Keimah hi lam le biatak le nunnak ka si; keimah sinin ti dah lo cun ahohmanh Pa sin an phan kho lo.” (Jn 14:1;6)

Khuaruahhar lungrethei in kan um nak hnga lo ding caah Jesuh nih nihin ni caah kan rel kan theih mi cathiang (Jn 14:1-6) Thawngthabia chungin a kan cawnpiak. Chikhat dai tein um law na sining kha i ruat hmanh! Lung retheih nak an petu hna le an pek bik mi hna kha ruat hna hmanh. Cun Jesuh Khrih na cungah a thatnak na ruah bal le ruah bal lo timi zong kha ruat. Nangmah le nangmah na lung chungin cuai thlai hna hmanh.

Jesuh Khrih nih, “Ka Pa kha zum u, keimah zong kha ka zum ve u,” tiah a kan ti. Pa Pathian, Fapa Jesuh Khrih le Thiang Thlarau Pathian cungah zumhnak kan ngei tak kho dih hna maw? Zei tlukindah kan zumhnak a thuh, a san? Jesuh Khrih kan pawngah a um zungzal ko timi hi teh kan zumh i kan zumh mi kha kan i thei tak hna maw? Asiloah Zarhpi Ni ca lawngah maw Khrihfa kan si? Harsatnak kan ton lawngah maw Jesuh kan kawl, kan kawh i bawmhnak kan hal?

Jesuh nih cun a sin kan panh ding hi a kan duh piak zungzal ko. Amah he fek tein kan i pehtlaih ding hi a duh zungzal ko. Kanmah hna he fek tein um ti peng ding hi a duh zungzal ko. Kanmah lei in zeitlukindah Jeush he i pehtlaih duhnak lungthin kan ngeih timi hi ruah than ding a si. Jesuh caah kan lungthin innka kan hun zungzal ding a herh.

Jesuh Khrih he kan um, kan kal a si ah cu teinak kan hmu zungzal ko lai. Zeicah kan ti a si ahcun, Jesuh cu “Lam le biatak le nunnak,” (Jn 14:6) a si caah a si.

Add new comment

4 + 3 =