Aa dawh bik mi thil cu…

Zuksuai thiam pa pakhat nih vawlei cungah aa dawh bik mi thil suai ding ah, ruahchannak nganpi he minung pathum kha ruahnak a hal hna, ti si. Siangbawi pa pakhat nih cun, zumhnak a si a ti. Cun mah zumhnak cu biaknak lei he aa pehtlai in hrambunhnak ah na hmuh lai a ti.

Ngaknu dawhte pakhat nih cun,  dawtnak  a si  a ti. Dawtnak cu lung retheihnak kha lung hnangamnak ah a canter, mitthli hna kha a thlumter, dawtnak a um lo ahcun aa dawhmi zong a um kho lo a ti ve.

A baa tuk i, a uai hnaang ngaimi ralkap pa nih cun, daihnak hi vawlei cungah cun aa dawh bik mi a si ko a ti ve hoi. Ral ti mi hi a zoh a chia tuk daihnak hmun lawng ah aa dawhmi thil hi an um kho a ti. Zuksuai thiam pa nih cun, zumhnak,  dawtnak le daihnak, mah hna pathum cu zeitindah ka suai hna hnga tiah khua fakpi in a ruat.

A lu a thin i innlei ah a kir thluahmah. Inn a vun phan i  inn ka a vun luh bak ahcun, a fa le mit ah a mah an bochannak le an zumhnak a vun hmuh colh, a dawtmi a thaisung nu  nih hmaipanh te-in a vun mirhmi dawtnak, cun an chungkhar in dawtnak le zumhnak he an sak mi daihnak kha voikhat te ah a vun hmuh khawh. Cutik ah, zumhnak, dawtnak le daihnak cu a vun suai thluahmah. A suai mi cu, zumhnak, dawtnak le daihnak he a khatmi a suai i a min ah INN tiah a ttial.