Abiapi Deuhmi Thim Ding

"Mary nih ahmaanmi thil cu aa thim cang i cucu ahohmanh nih an chut lai lo." (Lk 10:42)

Nihin ni caah Bupi nih a kan thimpiak mi cathiang cu Luke 10: 38-42 a si i Jesuh nih Martha le Mary timi unau hna a len hna nak kong a si. Unau rual hna zong Jesuh he aa thei hngal ngaimi an si nak kha an biachimmi zoh in theih khawh a si ko. Cun hi cathiang chung zong in hin hawikom ṭha ngeih a ṭhatnak kha fiang tein hmuh khawh a si fawn. 

Kan Lai tlang sining phun tein vun zoh hmanh hna u sih law Martha le Mary sining te hi ka i fiang deuh men lai. “Jesuh le a zultu hna cu khual an tlawn lioah khan khua pakhat an va phan i cuka ah cun minu pakhat a min Martha a simi nih a inn ah a rak tlunter hna,” tiin kan hmuh (Lk 10: 38). Jesuh hnu a zultu hna zongah hin nu a cheukhat an i tel kha philh lo ding a si fawn (Lk 8:1-3). Cuasicaah Martha te inn a tlungmi hna hi an tam ngai lai timi cu a fiang ko. 

Kan hawikom le i theih hngalh mi hna nih a kan len tikah siseh, an kan tlawn tikah siseh kan sin an phanh paoh ah cun an pawngah kan um, kan ṭhutpi hna i bia kan ruah tawn ko hna. Jesuh le a zultu hna zong innchungah umter sawh menmen siloin inn ngeitu chungkhar chungin Mary nih a umpi ko hna. Khamhnak thawngṭhabia a phuang lio mi hna kha a a rak bulṭawl ve hna a si ko. 

Cun Martha nih Jesuh a chawnh ning kan zoh tik zongah Jesuh he aa thei hngal ngai mi a sinak kha kan hmuh khawh fawn. Aa theihngal mi hna lawng nih pakhat le pakhat cungah ngamh sang ngai in biachim ngam a si tawn. Martha nih: “Bawipa, ka nau nih keimah lawng rianṭuan a ka rinh hi na zei a poi lo maw? Va bawm tiah hun chim,” tiah a ti. Mary nih a bawmh lo zongah Martha a bawmtu an um ṭhiamṭhiam ko lai. “Jesuh le a zultu hna kha zulh in an ngeihmi thil in a rak bawmtu hna, nu dang tampi,” timi te zong kha philh lo ding a si. Kan Laitlang sining phun tein ruat hna u sih tiah ka ti bang khan Jesuh hnu zul nu a cheukhat nih hin Martha rian cu an bawmh hrimhrim ko lai. Zeicah tiah cun mibu an tam caah a ṭuan tu zong an tam a herh ve ko.

Bawipa nih: “Martha, Martha, thil tam tuk kong ah na lungre a thei i na ing a puang, sihmanhsehlaw a herh taktakmi cu pakhat lawng a si ko. Mary nih ahmaanmi thil cu aa thim cang i cucu ahohmanh nih an chut lai lo,” tiah a ti. Jesuh le a zultu hna cu khual an tlawng i thlarau nunnak le khamhnak thawngṭhabia an chim, an phuan lio a si. Martha le Mery te inn zongah khamhnak thawngṭhabia a phanh lio a si. Cu thawngṭhabia cu ṭha tein a ngai mi cu Mary kha a rak si. Thawngṭhabia kan ngaih ding kha Jesuh nih a kan duh piak mi a si. Cun Pathian kha pakhat nak ah kan chiah hmasat ding a kan duh piakmi a si fawn. Martha nih thawngtthabia le a phuangtu hna cu a cohlaan ko hna nain a nau Mary bantukin a ngai manh lo, a thei dih manh lo. Martha nih a biapi deuhmi kha aa thim ding kha Jesuh nih a duh piak mi a si ko. 

Dawtmi u le nau hna kan nih hna zong Martha le Mary pahnih hna bangin kan si cio tawn ko. Ahohmanh sual phawt ding an um lo. Kan nih hna zong abiapi deuh mi thil aa thim thiammi kan si a herh ve.