Act 1:6 - “Bawipa, atu caan ah hin maw Israel mi cu uknak kha na pek than hna lai?” tiah an hal.

Act 1:6 -  “Bawipa, atu caan ah hin maw Israel mi cu uknak kha na pek than hna lai?” tiah an hal.

Kan Bawipa Vancung a kai hnu ah kan nih hna nih hin tah zeidah kan tuah ve hna lai? Midang pakhat khat nih kan caah thil pakhat khat kan tuah piak hna seh tiin maw ka thut sawh i kan um sawh ko hna lai. Um sawhsawh i thil pakhat khat a hun i thlen te lai ding lawng hngah a palhnak konglam hi nihin a voi (1) Bible cathiang kan rel mi chungin kan hmuh khawh.

Biakam hlun chungah Bawipa Pathian nih Israel mi hna kha a mi si dingin a thim hna i Egypt mi hna kut tang sal tannak in a rak khamh hna. Rili sen a tanpi hna i thetse ramcar chungin Canaan ram lei ah a rak hruai hna. Sihmanhsehlaw, Biakam thar a hun phanh tikah cun hlaan lio thil sining hna le ruah ning hna kha a hung i thleng dih.

Taksa lei luatnak lawng a si lo, thlarau lei luatnak lei tu ah cawnpiak a hung si cang. Biakam thar chung Bawipa nih a kan cawnpiak mi ram le hmunhma cu vancung ram konglam a hung si. Israel mi hna sal rak sinak chungin a rak tlenh hna i rili sen a rak tanpi hna bantukin, tipil innak thawngin minung sining ah chuahpi mi sualhram in Bawipa Jesuh nih a kan tlenh tthan cang. Biakam thar kan khualtlawn nak cu misual kan rak sinak chungin thianhpiak i zungzal nunnuamhnak vancung ram lei tu ah a hung si cang.

Sihmahsehlaw, nihin kan rel mi voi (1) nak cathiang chungah zultu hna nih Bawipa cawnpiak nak hngalh khawh loin biakam hlun cawnpiak ruahchan nak lawngah an lung a um rih ko kha fiang tein kan hmuh khawh. (Cun Rome miphun hna uknak chungin a kan tlanh lai ti lawng an rak i rauhchan.)

Bawipa vancung a kai hnu ah  kan nih hna nih tah zei dah kan tuah ve hna lai? Um sawh i pawngkam thil aa thlen ning lawng maw kan zoh sawh ve hna lai i kan hngah sawh ve ko hna lai?

Bawipa nih a kan ti mi cu: “Vawlei cung khuazakip ah ka tehte nan si lai” (Act 1:8) tiah a kan ti. Matthai Gospel thawngtha chungah Bawipa vancung a kai hlan te ah a zultu hna sinah robia a cah ta mi hna cu: “Khuazakip ah va kal u law miphun vialte kha ka zultu ah va ser hna u; Pa le Fapa le Thiang Thlarau mi in tipilnak va pe hna u, kan fialmi vialte hna hi an zulh nak hnga va cawnpiak hna u. Cun hihi philh hlah u: nan sinah a zungzal in, caan dongh tiangin ka um lai” (Matt 28:19-20) tiah a ti hna.

Cu bantuk mission rianpi zultu hna a fial hna bantukin zultu hna i rian changtu bishop si hna seh, bishop rian a bawmtu Siangbawi si hna seh, cun zumtu pakhat cio hna nih tah zei rian dah kan ttuan ve hna lai. Kan um sawh ko lai i maw zultu hna bantukin “zeitik ah dah na uknak a tlun lai” tiin kan hngah sawh ve ko hna lai? Bawipa Jesuh nih a zultu hna aa bochan hna i rian a pek hna bantukin Bawipa nih pakhat cio kan cungah a kan bochan ve ko. A rian thiang ttuan dingah nang le kei zong kan i tel ve.

Khrihfa a si mi hna nih pawngkam hrawktu si loin Pathian kutneh a vengtu (Gen 2:15), midang cungah Pathian muisam hmuh thiam i Pathian fa nu fa pa si nak mikip nih an theih khawh nak hnga ding caah le khamh an si ve cio nak hnga ding caah  “vawlei cung khua zakip ah ka tehte nan si lai” (Act 1:8) a kan timi kha thei zungzal hna u sih.