Act 18:10- “Hi khua chung i a ummi hna lakah mi tampi ka minung an si caah ahohmanh nih harnak an in pe kho lai lo”

“Hi khua chung i a ummi hna lakah mi tampi ka minung an si caah ahohmanh nih harnak an in pe kho lai lo” (Act 18:10)

Nihin ni ah ruah ti tthan ka duh mi cu Catholic Khrihfa kan si mi hi i zah pi hrimhrim hna hlah u sih. Micheu khat cu bu dang, zumh kal ning aa lo lo mi hna hmai ah vailamtah hmelchunnak hmah a tuah ngam lo mi tampi kan um. Upat kan pek mi Bawinu Mary kong a chim ngam lomi zong tampi kan um. Pumh caan zongah necktie le coat angki leng ttha hruk loin mi hmai ah a dir ngam lo mi zong tampi kan um. Mah zong hi a herh ngai mi zong a lo kho men lai. “Bawipa nih cun lungthin kha a zoh”(1Sam 16:7)

Ruah tti tthan ta ka duh rih. Catholic bupi cawnpiak ning cang theih ttung loin, thawngttha chim a thiam, a lar ngai mi hna he i ton tik paoh ah mihmai chuah riangmang in tehte a khang mi hna kha zoh rih hna u sih. Catholic bupi cawnpiak mi zumh ding hna hi tah ttha tein an thei taktak maw? Biakinn pumh lio caan hna ah hin tah a phung men in maw kal a si; siloah, Bawipa thawngtha bia theih duh tak le Bawipa thisa cohlaan duh tak ah dah kan kal?

Mah lungtho tein biakinn ah va kal in ttha tein thla a cam mi pa zeizat dah kan um?  Harnak kan ton lio lawng ah maw Bawipa sinah thla kan cam? Bawipa pek mi vel-thluachuah hna caah tah Bawipa Pathian sinah lawmhnak voi zeizat dah kan chim bal?

Catholic bupi cawnpiak mi sacrament kong hna hi tah ngakchiat lio, Sunday school kai lio lawng cawn ding ah maw kan ruah? Pathian nawlbia pahra hna hi tah ttha tein kan zul maw? Bupi cawnpiak nak nawlbia hna hi tah ttha tein kan zul hna maw?

A cunglei ruah ding tete hi ttha tein ruat hna u sih law Catholic Khrihfa nunzia thei tthan hna u sih.

Bupi chung um Pathian rian thiang a ttuan mi siangbawi hna khi zoh ta hna u sih. An i hruk aih mi thilpuan hi leng lei dawhnak caah a si lo. Vawlei rumnak kal tak in midang hmai ah ruam kainak ngeih lo dingin, “vawlei nuamnak ka kal tak cang” ti langhter nak ding caah hruk-aih mi a si. Style thoh a si lo.

Bupi chung mithiang tampi hna zong zoh tthan hna u sih. An caah a herhtak mi thilri tlawmpal lawngin a nung i Pathian rianthiang tuan khawh nak hnga caah an nunnak aa pe mi an si. An i pekchanhnak kha an nunnak in an langhter i an thlacam nak kha an nunnak ah a langhter mi an si.

“Cucaah cun nang cu lungtum, Peter, na si, kan ti. Cun hi lungpi cungah hin ka Khrihfabu hram ka bunh lai i cucu thihnak hmanh nih a tei kho lai lo” (Matt 16:18) tiah Bawipa nih a timi lungpi cung dirhmi Catholic bupi chung um hi i zah pi ding hrim a si lo.

Nihin kan rel mi (Act 18: 9-18) chungah mithiang Paul zong nih soiselnak tampi a in kan hmuh. Judah upa hna zong nih thil ning cang loin biafoihnakle  sual puhnak zong tampi an tuah. Sihmahsehlaw, Bawipa nih “Hi khua chung i a ummi hna lakah ah mi tampi ka minung an si caah ahohmanh nih harnak an in pe kho lai lo” tiah a ti bangin Catholic Khrihfa hna zong nih kan zumhnak hna hi theih i zuam hna u sih. Tukforhnak le soiselnak hna cu “thihnak hmanh nih a tei kho lai lo” tiah Bawipa nih a ti bangin chunglei ral siseh, leng lei ral hna siseh a kan tei hrimhrim lai lo.  “Bawipa  cu ka himnak le ka ralhruang a si, amah cu a ka tlanhtu a si” (Pslm 118:14).

Add new comment

1 + 15 =