Aho hnu dah kan zulh

Nihin kan theih hnga ding mi thawngttha chungin ruah tti ka duh mi cu "Aho hnu dah kan zulh" timi te hi a si. Bawipa nih:

“Ngai hmanh u! Cenghngia hrang rual lak i thlahmi tuu bantukin kan thlah hna. Cucaah rul bantukin vaa fim u law ṭhuro bantukin nan nun va nem u” (Matt 10:16) tiah a kan ti. Biakam hlun chung kan zoh tthan a si ah cun, Prophet Isaiah chungah kan hmuh tthan mi cu: “Cenghngia le tuu kha hmunkhat ah dai tein an tlong ṭi lai i pawlai le mehehfa cu an bawk ṭi lai. Cawfa le chiandeih no kha rawl an ei ṭi lai i ngakchia tete nih khan an zohkhenh hna lai” (Isaiah 11:6) tiin kan hmuh fawn.

Sihmahsehlaw, zumtu Khrihfa a si mi hna nih kan theih, kan hngalh hnga ding mi cu “a ho hnu dah kan zulh” ti hi a si. Bawipa nih ka sinah ra u; ka nawl i cawn u tiin a kan ti mi hna hi zeidah an si ti kan thieh a herh hrimhrim mi a si.

Bawipa hnu kan zulh a si ah cun Bawipa nih a intuar mi hna kan intuar thiam ve ding le kan cohlaan thiam ve ding a si.

Tuchan zongah canghngia bantuk a si mi tukforhnak phuntling lak ah a um i a nung mi kan si. Fawi le bai tein thil ti khawh duh nak, thil cohlan duhnak lungthin nih a kan tei tuk. Tak sa lei mit lawng in kan nun a si ah cun thlarau lei he aa pehtlai mi thil kal ning hna cu kan hmu kho hrim lai lo.

Thlarau lei in a kan cawnpiak tu thil vialte hna cu nunnemnak lei le toidornak lei ah a kan hruai tu an si caah Bawipa nih a kan cawnpiak mi thlarau lei nun zia thiam hna u sih.

Vawlei thil sining ah vawlei ral a tu lio mi hna nih taksa thih lo in raltuknak ah teinak hmuh  dingin i zuam a si. Sihmanhsehlaw, thlarau lei thil kal ningah Bawipa nun zia, intuar thiam nak le toidornak, nunnemnak le dawtnak lam zulh in Bawipa zulh mi lam zulh khawh i zuam cio hna u sih. Nan dihlak cungah Bawipa nih thluachuah in pe ko hna seh.