Aho hnu dah kan zulh?

“Cu ruangah cun a zultu tampi cu an i let tthan i an zul ti lo.” (Jn 6:66)

“Bawipa, aho sinah dah kan kal hnga? Zungzal nunnak bia a ngeitu cu nangmah pei na si cu.” (Jn6:68)

“Jesuh nih khan a hramthawkte in ahodah a zumtu an si lai i ahodah a ka leitu an si lai ti kha a hngalh ko.”(Jn 6:64)

Nihin kan relmi cathiang (Jn 6:60-69)chung kan zoh tikah Pathian a hmu i a cohlaang mi hna le Pathian a kal tak mi hna  tiin kan hmuh khawh. Pathian a hmu mi hna phu chungin mithiang Peter hi phu aiawh tu in zoh hna u sih.

Peter hi minung pakhat a si ve bangin tlin lo nak tampi a ngei mi a si ve ko. Sihmahsehlaw tlam a tling dihmi minung ka si lo ti aa thei mi a si. Mi lung rang pakhat a si caah zultu dang hna nak in palhnak tuah zong a caah a fawi deuh lai. Sihmahsehlaw, a Bawipa Jesuh bia a ngai zungzal mi a si. Jesuh chim bangin a nung a dir i Jesuh pawngah a um zungzal mi zong a si. Jesuh he aa neih tein a um zungzal caah tukforh nak a in tikah khamh a si colh zungzal. A Bawipa a dawtnak cu hi tin a phuan: “Bawipa, aho sinah dah kan kal hnga? Zungzal nunnak bia a ngeitu cu nangmah pei na si cu”(Jn 6:68) tiin tehte a khang mi a si. A Bawipa cungah dawtnak a ngeih nak le aa bochannak nih zultu hna vialte lakah “Lu bik” “Hruaitu” siding in Jesuh nih a rak thim mi a si. Pathian aa bochan peng mi hna le a pawngah naih tein a um peng mi hna cu thluachuahnak le khamhnak an hmu zungzal.

Pathian a kal tak mi hna phu chungin phu aiawh tu ah Judas Iscariot hi zoh hna u sih. Judas zong hi zultu dang hna bantukin Jesuh cawnpiak nak a thei i a ngai zungzal mi a si ve ko. Sihmahsehlaw, a ngaihmi thawngtha bia hna kha  a lung chungah hrambunh in aa nunpi kho hna lo. A min a thang ngaimi Jesuh hnu zulh in minthan le hmunhma hmuh a duh zungzal mi a si. Vawlei mithmuh in a laarmi si duh nak lawng te nih a lungthin a huh dih caah Pathian bia i nunpi khawh loin Satan tu nih Pathian dohnak hriamnam tu ah a rak hman mi a si. Phaisa kha pathian hmun ah a chiah ruangah a hakkauhnak nih a rak hlen diam. A donghnak ah cun a tuanbia zong nihin ni tiangah an ttha kho ti lo.

Mi tampi cu Jesuh nih rawl a dangh hna ruangah le an zawt fahnak in a rak damter hna ruangah Jesuh hnu an rak zulh. Sihmanhsehlaw, zungzal nunnak kong le phunglam “a Thisa kong” a chimh hna tikah an kal tak dih. Zultu hna dah ti lo cu ahohmanh an tang lo.

Kan nih pakhat cio zong kan sitthat lio lawngah Pathian a thangtthat i a hnu a zulmi maw kan si; Pathian cawnpiak mi a cohlang tak i aa nunpi tak mi dah kan si? Ruat cio hna u sih. Pathian aa thimmi maw kan si, a kal tak tu dah kan si?