Aho nawl dah na zulh?

“Sabbath cu minung caah pei ser a si cu, minung cu Sabbath caah ser an si ṭung lo, cucaah Mi Fapa cu Sabbath Bawi zong a si,” tiah a ti. (Mk 2:27-28)

Sabbath ni cu kan pumsa caah rian kan ṭuan, chawva kan kawl-hawlnak in i dinh caan le Bawipa Pathian thangṭhat le biaknak caan a si: “Sabbath ni kha philh hlah u, Bawipa caah va hmang u. Nan rian vialte kha ni ruk chung nan ṭuan lai, sihmanhsehlaw ni sarihnak ni cu dinh ni a si i Pathian caah nan hman lai. Cu ni ah cun ahohmanh rian nan ṭuan lai lo, nanmah siseh, nan fale si hna seh, nan sal si hna seh, nan saṭil si hna seh, nan khua chung i a ummi miphun dang si hna seh, ahohmanh rian nan ṭuan lai lo.” (Exodus 20: 8-10)

Zeibantuk (law) phunghram paoh ah hin exception timi onh mi tete hi an um ṭheo tawn ko. 

Farasi mi hna nih Sabbath ni ah tuah lo ding a si tiah an ruah i an chimmi kha Jesuh nih cun biapi tuk ah chia lo i aa buaipi fawn lo. Chim duhmi cu minung hna caah ṭhatnak a chuahpi tu a si lo mi paoh kha cu zulh lo zongah a poi lo tinak a si. Minung nunnak caah a ṭhahnem mi tuah ding mi kha Sabbath ni ah tuah ding a si ko.

Phunghram(law) kan timi cu minung hna nih nun ṭha, hnangam tein an nun khawhnak hnga ding caah lam hmuhsak tu le bawmtu menmen kha a si ko. Minung hna harsatnak a petu phunghram a si ah cun zulh lo ding a si ko. 

Micheu nih cun chung lei in mah le mah i phihkamhnak kan ngei tawn. Pawngkam midang hna caah ṭhatnak chuahpi tu si loin mah zawn lawng aa ruat mi zong kan um. Thil ṭha a tuah mi hna cungah nahchuahnak lungthin a ngeimi hna zong kan um fawn. Mah bantuk lungput ṭhalo le tuahsernak hna in khan kanmah le kanmah zong fahnak tamtuk kan i pe tawn. Jesuh nih cun mah bantuk lungput kha a duh lo. Amah nunnak hrimhrim kha kan zoh a si ah cun Khrihfa mi hna nih zeitin dah kan nun ding a si timi kha fiang tein hmuh khawh a si ko. Jesuh nun zia cu Pathian duh mi nun zia a si caah, Jesuh nunzia he aa ralchan  mi nunzia in a nung mi hna cu Jesuh ral, Pathian ral an si tinak zong a si ko. 

Dawtmi u le nau hna Khrihfa kan sinak ah hin Khrihfa taktak si nak in nung hna u si. Khrihfa nun zia timi cu Jesuh nunzia kha a si ko. Mah zawn lawng ruah loin siannak lungthin he nun kha a si ko. Khrihfa mi hna caah ṭhatnak va tuah hlah timi a um lo. Ṭhatnak na tuah tikah an dawn khaantu zeidah a si tawn?