Ahodah a Ngan Bik

Photo Credit

Zultu hna nih an karlakah ahodah a ngan bik a si timi bia an i al cuahmah mi kha Jesuh nih a theih, a hmuh tikah, ngakchia pakhat kha zultu hna sinah cun a chuahpi i: “Ka min in hi ngakchiate tluninn a onhtu nih keimah tluninn a ka onh a si, cun keimah tluninn a ka onhtu nih keimah a ka thlahtu tluninn a onh kha a si. Zeicahtiah nan lak i a hme bikmi cu a ngan bikmi a si,” (Lk 9:48) tiah a ti. Jesuh nih ngakchia kha zultu hna sinah a hmuhsak sawh hna lawng siloin “Pathian rian thiang ṭuannak ah hin tongdornak lungthin le nawl ngeihnak lungthin ngeih ding a herh,” timi kha a cawnpiak duh hna ruang zongah a si fawn. 

Tangdornak lungthin a ngeimi nih cun reng le a sang mi hmunhma timi hna khi a zoh lem hna lo. Ahodah a lian bik mi a si timi zong biapi ah a chia fawn lo. Amah nih a tuah hnga ding mi rian kha ṭha tein a ṭuan khawh nak hnga ding tu kha abiapi bikah a chia mi a si. Midang hna nih zeitin dah an ka ti lai, an ka ruah lai, an ka thangṭhat lai timi hna zong a ruat mi a si lo. 

Pathian rian kan ṭuan tiah kan ti fawn ṭung, hmunhma ca lawngah khua kan ruah fawn a si ahcun Jesuh a lung kan tuai tuk sual lai. Kan phu chungah siseh, kan bu chungah siseh keimah hi “Abiapi bik mi ka si” timi zong ruah ding a si lo. Kan tuah hnga ding mi le kan ṭuan hnga dingmi hna tu kha ṭha tein kan tuah, kan ṭuan ding a si ko. Aa tlak mi kan si ahcun Pathian nih a kan tinhpiakmi hmunhma te cu a um ko lai. “Kan dihlak chungin keimah hi thil a ti kho cem mi ka si” timi lungput zong ngeih lo ding a si. 

Zultu hna pakhat le pakhat bia an i al cuahmah mi kha Jesuh nih ṭha tein a theih ko. Sihmanhsehlaw law, Jesuh nih zultu hna sinah direct in a let colh hna lo. Ngakchia te tu kha hmangin a cawnpiak ko hna. “Ka min in hi ngakchiate tluninn a onhtu nih keimah tluninn a ka onh a si, cun keimah tluninn a ka onhtu nih keimah a ka thlahtu tluninn a onh kha a si". Jesuh nih zultu hna sinah fiang tein a chim nolh ṭhan mi cu: “Zeicahtiah nan lak i a hme bikmi cu a ngan bikmi a si,” timi kha a si.

 

Add new comment

8 + 4 =