ATHIANGMI A SINAK

Thiang Thlarau i athiangmi a sinak

Voihnihnak Vatican tonpumnak (LG. 41) nih Bupi a cawnpiak mi cu: aa khahlo mi nunning cio le pawcawmnak rian cio caah thiannak pakhatte cu Pathian thiannak kha si. Zeitindah, cu thiannak ahcun kan i tel ve lai? Bible nih a cawnpiak mi cu Pa Pathian duhnak kha tuahnak (Jn. 6:38), Thiang Thlarau lam hmuhsaknak tangah nunnak an si. Bible nih “Maw… Pathian nangmah nih tuah seh ti na ka duhmi tuah awk ah ka ra (Heb. 10:7,9; Ps. 40:7-8). Hibantuk Bible cawnpiaknak kha mah nunnak  siternak in siseh, mah le nunnak cio i tonmi harnak buainak hna, ading le dinglo hri hnuhnak hna, ṭhatnak le ṭhatlonak karlak hri hnuhnak hna, huatnak le dawtnak karlak nunnak pek in ithimmi sining hna, rimthawlo ahakmi nunnak he iton caan hna ah mah vailamtah kha Jesuh Khrih he hmunkhatte iputnak in a ṭhami thil, ahmaanmi thil, dawtnak he pehtlaimi thil, ningcangte asimi thil hna kha Jesuh Khrih minin ithim hnuah, mah nunnak pek tiangin Bawipa sin dinfelnak in, zumtu paoh cu mah nunnak cio in athiangmi Pathian asinak ah telvenak nawl kan hmuh.

          Ahuap in chim ahcun, Thiang Thlarau he aa pehtlaih mi asiahcun athiangmi sinak a ngei lai. Athiang lai kan ti tikah Pathian duhnak he aa tlakin kan nun awk asi lai. Pathian duhnak he aa tlakmi nunnak kan ti tikah a cunglei i St. Paul cawnpiak mi Thlarau laksawng hna ah nunnak kha asi. Cubantuk Thlarau sining ṭhatnak hna ah nun khawh dingin Pathian nih mah thazaang lawng ibochan dingin a chiahta lo. Thiang Thlarau Pathian cu kan tuahkhawh lomi thil hna ah a kan bawmhchanhtu asi (Rom. 8:26-27).

          Tuchan Khrihfa tuanbia thar ah Thiang Thlarau Pathian rianṭuannak le Bawipa huham hna he pehzulhin vawlei chan sining in kaupi kan theih kan hmuhmi cu alawk a umlo. Cubantuk Thiang Thlarau Pathian kong kan theih tikah ahmaan le hmaanlo, aṭha le ṭhalo, athiang le thianglo tiin cawn le cekhlat awk abiapi asi kha philhding an silo. Cuti cekhlatnak ah Thiang Thlarau Pathian i sining asimi thiannak cu cekhlatnak, cuaithlai soisel tuaktannak tuahkhawhnak caah a umlo awk aṭhalo mi abiapi mi tahfung pakhat asi. Ahleikhun tukmi khuaruahnak phunkhat cu atu chanthar Khrihfa hna a khuhchilh mi kha kan hmuh. Cu ahleikhun mi khuaruahnak cu Thiang Thlarau Pathian he aa pehtlaih cang ahcun cekhlat ahau tilo, hlathlai zong ahaulo tinak asi. Khi khuaruatnak cu Thiang Thlarau Pathian minchalh in mah duhnak ningin chim a duhmi hna caah caanṭha hmuhnak innkapi hunpiaknak a rak si.

 

Add new comment

3 + 13 =