Auhnak

Photo Credit

Nihin ni caah Bupi nih a kan thimpiak mi cathiang cu Jesuh nih Matthai a kawhnak kong a si (Matt 9:9-13). Jesuh nih a kalpah khan ngunkhuai khawltu Matthai a zung i a rak thut ko kha a hmuh tikah amah cu, “Ka zul,” tiah a ti i Matthai cu a tho colh i Jesuh hnu cun a zulh.

Matthai zong nih aa lawmhnak langhternak le i hawikomhnak langhternak caah tiin Jesuh le a zultu hna kha zanriah ei a sawm hna. Cu lio ahcun misual tiah hmuh a si mi hna Matthai a hawi dang tampi hna nih khan Jesuh le a zultu hna cu zanriah an dumpi hna. Cucu Farasi mi hna nih an hmuh tikah Jesuh kha an thangchiat: “zeicahdah nan sayapa hi ngunkhuai khawltu hna le misual hna he rawl an ei ti?” tiah an ti. Sihmanhsehlaw zultu hna nih bialehnak an tuah hlaan ah Jesuh nih, “A dammi nih cun sibawi an herh lo, a zawmi lawng nih khan an herh. Va kal u law, ‘Saram thawinak si loin ka duhmi cu zaangfahnak lungthin kha a si,’ tiah Cathiang chungah aa tialmi hi a sullam va ruat tuah u. Miding mi pawl kawh awkah ka rat tung lo, misual mi hna kawh awkah pei ka rat ko cu,” tiah a ti hna. 

A tu lio sining kan zoh tikah Pope Francis hi zohchunhawk tlak le uar a um ngaimi minung a si. A umkal ning le a chimphuan ning hna zoh tikah Jesuh hnu zul taktak a si. Sifak harsa hna aiawh in bia a chim, refugees hna caah bia a chim, i tuk i kahnak hmun ah mipi aiawh in daihnak le remnak bia a chim. A tlawn-kal nak hmun paoh ah lawmhnak a chiah tak khawh. 

Nihin ni zongah Jesuh nih a hnu zulh ve dingin a kan sawm cio. Lunglawm tein Jesuh hnu kan zul kho cio hna maw? Ramkhat le ramkhat, hmuhkhat le hmuhkhat i nahchuahnak le i rem lonak he a khat mi kan vawlei pi nih zaangfah thiamnak lungthin le lawmhnak tampi a herh. Jesuh nih a kan zaangfah bantukin kan nih pakhat cio hna zong pakhat le pakhat cungah zaangfahnak le dawtnak lungthin kan ngeih a si ahcun, midang cungah kan tuah, kan langhter mi sining nak in a let zakhat in pek than kan si ko lai.

 

Add new comment

9 + 4 =