Bawinu Mary Vancung ah cawisan a si bangin

Nihin cu kan Nu Mary Vancung an cawisan nak (The Assumption of the Blessed Virgin Mary)puai ni a si. Bawinu Mary, hi vawlei a nunnak a dih hnu vancung ram ah “Taksa thlarau” he an cawisannak puai kan tuah ni a si.

Vawlei taksa lei in a kan hringtu kan nu nak in Bawinu Mary cu kan tthatnak caah khua a kan ruat piak kho deuh zungzal tu a si. Zeitluk in dah a kan ruah piak thiam tiah cun kan caah amah “mitmu” bangin kan si. Hitin amah cawnglawmhnak puai kan tuah mi zong hi tuah phu tuk mi le kan tuah mi zong a sullam a ngei tukmi a si. “Bawinu Mary cu amah bawmhnak a kawl mi vialte hna i an i dornak khuapi a si” tiah St. John of Martian nih a ti.

“Kan pumsa a dih lak in “Lei”(tongue) ah i cang hmah sehlaw Bawinu Mary thangtthatnak ding caah aa za kho hrim lai lo” tiah St.Augustine zong nih a ti ve. “Van le vawlei a uktu Siangpahrang a hringtu nu, nang cu thluachuk veel he a khat mi nu na si” tiah Bupi zong nih a thangtthat. Bawinu Mary cawnglawmhnak cu van tluk in a sang i a kan dawt nak cu rili a thuhnak bik nak hmanh in a thuk deuh mi khuaruahhar thil zong a si. Bawinu Mary thangtthat nak ding caah hi vawlei cung hmanmi biafang hna nih tahchunh khawh ding hrima si lo.

Thlarau lei he pehtlai in tuah mi puai vialte hna hi kan mah thlarau khamh a si nak hnga ding caah tuah mi puai a si bangin Pathian nih tuah hna seh tiah a kan duh piak mi tthanka thil hna cungah hin kan duhnak nun hram bunh zungzal ding a si.

Pa Pathian nih Bawinu Mary taksa le thlarau vancung ah a cawisan bangin, kan nih hna zong nih kan mah le kan mah siseh, minung a si mi vialte hna cungah upat cawnglawmh cawisan nak lungthin kan ngeih cio ding a si. Pakhat le pakhat i zohchuk ding a si lo, i nehsawh ding zong a si lo. Kan mah le kan mah kan i dawt thiam bangin midang cung zongah dawtnak le upat nak lungthin kan ngeih zungzal ding a si.