Bawipa Auhnak

Voikhat Bible relnak – Hebrews 4:12-16

Thawngtha Bia   - Mark 2: 13-17

“Aa chahpah ah khan ngunkhuai khawltu pakhat a zung i a rak that ko kha a hmuh. Cu pa cu Alfeas fapa Levi kha a si. Jesuh nih cun Levi cu, “Ka zul,” tiah a ti i a tho i a zulh colh.”(Mk 2:14)

• Nihin thawngtha bia ah Bawipa Jesuh nih Matthew a auhnak kong kan rel. Bawipa nih Levi cu a auh tikah, a reng, a min ngeih mi vialte a chiah tak dih hna i zeihmanh ruahchan nak ngei lo in Bawipa hnu a zulh kha kan hmuh. Bawipa nih Levia a auhnak kong kha ruah pah in Bawipa nih zeitin dah a kan auhnak kong kha ruat cio ve hna u sih.
• Tipil nak kan in dih in kan nih hna zong Bawipa hnu zul kan si ve hna. Zultu hna nih Bawipa cawnpiak nak kha an ngaih i a cawnpiak ning bangin nun khawh an i zuam cio hna. Kan nih hna zong zultu kan si ve bangin Bawipa cawnpiak ning in kan nun ve awk a si.
• Bupi chung rian kan tuan nak ah siseh, thatnak ca i kan i pekchanh cio ning cungah siseh, kan cawlcangh ning cio cungah hin Bawipa duh ning in kan nung kho ve cio cang hna maw? Zeicah kan ti a si ah cun Bawipa nih Levi (Matthew) bangin a kan auh cio cang caah a si.
• Cun Levi inn ah Bawipa cu misual mi hna he i dawt tein rawl a dum ti nak kong zong kan hmuh. Tuchan pakhat cio kan chungkhar nunnak ah i daw te in le i rualrem tein rawl dum ti nak hna zong kan tuah ti kho cio hna maw? Kei cu ka rian a tam ee, kaa manh lo ee, cu ka ah kal ding ka ngei tiin chungkhar tling lo in kan um sual hna maw? Bawipa nih i dawt te in le i rualrem te in khuasak ti ding hi a kan duh piak mi a si. Chungkhar cu aa daw mi hna um nak theipar kan si kha philh hna hlah u sih. Caan i pek khawh i zuam zungzal hna u sih.
• Cu a si caah, Jesuh nih an auh ning kha zeitin dah na leh ve tawn? Bawipa cu kan sin ah neih te in um zungzal a duh caah kan sin ah a rat kha philh hna hlah u sih. Kan nih hna zong Bawipi nih cun a kan len ko, a kan auh ko. Tlolh lo tein Bawipa pawng um khawh i zuam ve hna u sih.
• Bawipa cu michia, mitha thleidannak a ngei lo mi a si. Mikip kha dawtnak in a cohlaan zungzal hna. A hnu zulh ding ah a kan duh cio.
• Thla kan cam hnga ding mi cu: “Maw Bawipa, nifatin na aw thawng kan theih khawh nak hnga ding caah run ka bawm ko sawh” tiin thla cam hna u sih.