Bawipa Auhnak

Nihin Missa thawinak chungah kan relmi cathiang cu Luke 5:1-11 a si i Jesuh nih zultu hmasabik hna a rak kawh hna nak kong a si. Simon le a hawi le hna nih an thiammi ngatlaih rian an ṭuan lio ah Jesuh nih a kawh hna i a zultu si dingin a thim hna. 

Cuasicaah Jesuh nih a thim duh a si ahcun zeibantuk thil sining chung hmanh ah um ko hmanh hna sehlaw a thim ko hna. Pathian caah cun ‘caan le hmunhma, fimthiamnak le reng’ tiin rikhiahnak a um lo, thleidannak a um lo. Jesuh nih cun a duh mi paoh kha a zultu ah a thim ko hna. 

Zultu hna cu ngathlaih rian in a paw aa cawmmi an rak si hna bantukin ti cung lawngah rian a ṭuanmi hna zong an rak si. An pawcawmnak ding caah an thiammi cu ngatlaih rian lawng a si ko. Sihmanhsehlaw Jesuh nih a kawh hna tikah an pawcawmnak rian hna le an ngeihchiah (sur-tilawng, tbk…) vialte hna kha hnu ah chiah ta dih in Bawipa hnu a zul mi an rak si. 

Jesuh nih khuaruahhar thil a tuah mi Peter nih a hmuh tikah amah le amah a sining kha fiang tein a hun i hngal i: “Bawipa ka kal tak ko, kei cu mi sual ka si,” tiin Pathian hmai ah aa tlak lonak kha a cohlaan khawh, a chimphuan khawh. Kan i tlak lonak i theih hmasat cu Pathian hnu zultu salṭha sinak a herh bikmi a hrampi zong a si.

Luke 5:1-11 chungah nga a tlai lio mi zultu hna nih hin khuaruahhar thil a cang te hnga dingmi (thlarau tlaitu sinak) hi an rak thei hrimhrim lo. Sihmanhsehlaw Jesuh nih, “Nan thinphang hah u, atu thawk in mi nan tlai cang hna lai,” tiah zultu hna kha a ti hna. Nga tampi an thlaih mi khuaruahhar thil a cang mi nak nakin zultu hna nih zeizong vilate kaltak in Jesuh hnu an zulhmi kha khuaruahhar deuh awk a si. 

Kan nih hna zong nifatin kan nunnak ah Jesuh nih a hnu zulh ve dingin a phunphun in a kan kawh lengmang cio ko. Chawva lei in siseh, fimthiamnak lei in siseh tampi a ngei mi zong kan si ko men hna lai. Sihmanhsehlaw kan ngeihmi chawva-fimthiamnak hna kha kan hman tikah “KEIMAH” caah timi lungput ngeih loin “PATHIAN” caah timi lungput na ngei kho cang maw? Abiapi mi cu zeizong vialte hi Pathian caah siseh timi lungput ngeih ding hi a si. Peter le a hawikom hna nih “Zeizong vialte kha an kaltak i Jesuh kha an zulh,” tiah kan hmuh bantukin kannih hna zong nih Bawipa hnu kan zulh ve awk a si. An ngeihmi vialte Jesuh caah an hman sian, hman ding zongin ready an si bantukin kan nih hna zong nih kan zeizong vialte hi Pathian caah hmaan sian ve ding a si.

Kannih Khrihfa mi hna zong nih Pathian cungah kan zumhnak hi thuk deuh in a hrambunh hna u sih. Hi vawlei cungah kan ngeih mi chawva hna hmang in kan nun lio caah te ah Jesuh hnu zulh i zuam hna u sih.