Bawipa Auhnak

Jesuh nih a thawh i, “Nihin ah hi inn ah khamhnak a phan; hi pa zong hi Abraham tefa a si ve. Zeicahtiah Mi Fapa cu a tlaumi kawl awk le khamh awkah a ra,” tiah a ti. (Lk 19:9-10)

Nihin Missa thawinak chungah kan relmi cathiang cu Luke 19: 1-10 a si i Bawipa ni Zakia a cohlaan nak kong a si. Minung hmuhnak le Pathian hmuhnak aa dan ning, cun Pathian nih lungthin thiang tein a kawl mi hna kha a cohlaan hna timi zong nihin kan relmi cathiang chungin hmuh khawh a si.

Zakia cu miniamte va si ko hmanhsehlaw, vawlei chawva rumnak lei in cun a khan sang ngai mi a si ko. Zeicah tiah “amah cu mirum a si.” Vawlei chawva a ngeihmi nih a lung a tlinh kho hrimhrim lo, lung daihnak zong a pe kho dih lo. Ngeih chinchin a duh mi a si. Zakia nih hin Jesuh thawngpang zong tampi a rak theih khawh mi a si.  Jesuh Khrih kha hmuh a rak duh tuk caah ‘hmaiah khan a rak tli i saikamor thingkung pakhat ah, cukalei i a kalmi Jesuh hmuh duh ah cun a rak kai’ i Jesuh kha hmuh khawh aa rak zuammi a si. Aa zuamnak zong Jesuh nih theih piak lo in a um lo. Jusuh nih cun, “Zakia, khulrang in rung ṭum, na inn ah kan tlung lai,” tiah a ti. Jesuh nih a Zacchaeus duhnak a theih piak i a inn ah a tlun piak. Zakia cu misual a si tiah mikip nih ruah mi si ko hmanhsehlaw Jesuh nih cun lenglei zoh loin chunglei minung lungthin a zohtu a si caah biatak tein amah a kawltu Zakia kha dawtnak lungthin he a cohlaan ko. 

Bawipa nih cun kan thazang dernak, san kan tlaih lonak le kan sualnak lawng kha zoh loin dawtnak lunghtin he a kan cohlaan zungzal ko. Hlaan lio i rak sual-palhnak hna lawng kha zoh loin a tu caan lio sining le hmailei caan ah kan si te hnga ding mi tiang in a zoh tu a si. Sual ngaihchihnak he amah sin kan panh ṭhan ding kha a kan duh piak zungzal tu a si. Zakia zong nih Jesuh hmai ah sual ti lo dingin biakamnak a tuah mi cu, “Bawipa, ngaihmanh, misifak caah ka ngeihmi thil hnarcheu ka pek lai; cun ka hlenmi hna an um ahcun a let li in ka cham hna lai,” (Lk 19:8) tiah a ti. Jesuh nih a chimmi cu: “Nihin ah hi inn ah khamhnak a phan. Mi Fapa cu a tlaumi kawl awk le khamh awkah a ra,” tiah a ti.

Pathian cu a kan daw hmasa zungzal tu, a kan cohlang hmasa zungzal tu a si. Amah sin kan panh khawh ṭhan zong hi a kan dawtnak in a hung chuakmi theipar a si kha theih ding a si. Bawipa auhnak aw thawng kha theih in kan lungthin a thian biknak hmun chungah hmunhma pek zungzal ding a si.