Bawipa Duhmi Lungput

Johan nih a thawh i, “Saya, na min in khuachia a thawlmi pakhat kan hmuh i kan bu chungmi a si lo caah, tuah ti hlah, kan ti,” tiah an chimh. Jesuh nih cun, “Tuah ti hlah, ti hlah u, zeicahiah ka min in khuaruahhar mi thil a tuahmi nih cun ka thang cu a ka chiat kho lai lo. A kan doh lomi cu a kan bawmmi an si”. (Mark 9:38-40)

Nihin ni caah Bupi nih a kan thimpiakmi cathiang chungin Jesuh Khrih nih a biapi tukmi thil a kan cawnpiak; “A kan do lomi cu a kan bawmmi an si” tiah a ti. Nifatin kan nunnak ah kan i theih hngalhmi hna sining kan zoh tikah aho nih dah a lungthin tak tein a kan komh, a kan bawmh i aho nih khin dah aparpavuan in a kan komh ti cu kan theih cio mi a si. Micheu nih kan sining a kan cohlaan piak thiam hna i micheu nih cun a kan cohlaan piak kho hna lo.

Minung kan si caah a kan cohlaang tu hna khi tam deuh in mithmai pek kan hmang theo tawn. Jesuh Khrih nih cun mi vialte cungah dawtnak lungthin ngeih dingin a kan cawnpiak. A zultu hna zong cuti thiamthiam in a rak cawnpiak hna. Cun midang hna nih thil ti khawh deuhnak an ngieh mi cungah nahchuahnak lungput ngeih lo dingin a kan cawnpiak.

Jesuh Khrih nih kanmah thil ti khawhnak cung te ah le midang hna nih thil ti khawhnak an ngeih mi cungah i lung si dingin, cohlaan thiam dingin a kan duhpiak. Vawlei cung kan nun caan tawi te chungah pakhat le pakhat i doh le i zuam ding lawngin nun ding a si lo.

Midang hna cungah nahchuahnak lungthin na ngeih a si ah cun ngol ko cang. Cutin na um khawh a si ah cun na lung a nuam lai i na ngan zong a dam deuh lai. Nahchuahnak lungput ngeih cu sivai thalo i ngeih bantuk a si. Pawngkam caah zei thathnemhnak hmah a chuahpi kho lo. Rawhral nak lawng a chuahpi. Pakhat le pakhat dawtnak lungthin he i bawm zungzal hna u sih.