Bawipa, kannih zong thlacam kan cawnpiak ve (Lk 11:1)

“Bawipa, kannih zong thlacam kan cawnpiak ve”(Lk 11:1). Jesuh Khrih hrimhrim nih a kan cawnpiak mi thlacam ning cang biafang hi hmual a ngeituk mi biafang hna an si. Catholic Khrihfa hna nih kan ngakchiat lio tein zeitin dah thlacam ding a si timi, “Vancung um kan Pa …., Maw Mary ….. timi hna le a Dangdang thlacamnak” te hna hi kan nu kan pa hna sin in siseh, kan u le kan hawi le hna sin in siseh kan rak cawn cio hna i kan rak cam tawn hna.

Upa kan hun si hnu ah kan rak ngakchiat lio caan i a luat in kan rak cam mi thlacam nak hna kha a sullam ruah buin kan cam ding a si cang. Kan ngakchiat lio caan bang khan a luat menmen in cam ding a si ti lo. Thla kan cam ning cang hna hi aho nih dah a kan tuah piak i zei sullam in dah cam ding a si timi hi kan theih ding a si cang. Cun Bupi nih thlacamnak a kan tuah piak mi hna zong hi zei rello in um ding a si lo.

Thla kan cam tikah a luat menmen in a cammi kan si rih hna maw timi zong hi ruah awk a herh ngai mi a si fawn. Thla kan cam cu Pathian he pehtlaihnak kan tuah, bia kan chim tti a si caah, Pathian he kan i pehtlaihnak ah siseh, Pathian sin bia kan chimnak ah siseh, Pathian nih a kan cawnpiak mi thlacamnak hi hman in kan duh herh mi hna kha Pathian sinah kan chim a si ah cun hmual a ngei tuk mi a si ko lai.

Nihin ni caan zong ah Jesuh sinah: “Maw Bawipa, thlacam ning ka cawnpiak ve” tiin zultu han bangin hal hna u sih. Pathian sinah kan lungthin innka hun in a kan chimhmi le a kan cawnpiak mi hna kha ttha tein ngai hna u sih. A kan chimhmi kan theih thiam, kan cohlaan thiam i a kan cawnpiak ning in kan nun khawh a si ah cun khuaawng kan tong ko lai. Thluachuahnak tampi kan hmu ko hna lai.