Bawipa pekmi Rawl

Nihin Thangtha bia (Jn 6:1-15)chung kan rel mi hi kan zoh tikah Bawipa hi kan caah tawlreltu le a kan cawmtu a si zungzal nak kong kan hmuh khawh. Minung 5000 reng lo rawl a dangh hna nak kong zong hi Amah thi le sa hrimhrim in minung hna a kan cawm te lai nak hnga ding siseh, Bawipa cu nunnak changreu a si nak kong siseh, nifatin Thlarau thazang ti le rawl (Missa) chungin a kan cawm nak hna he hin pehtlaihnak a ngei.
“Khua a hei zoh i mi an rat lulhmalh kha a hei hmuh hna tikah”(Jn 6:5) timi hi kan zoh than tikah Bawipa hnu zulh in Bawipa thawngtha bia ngaih a duh mi hi vawlei cungah hin tampi an um ko. Sihmanhsehlaw, Bawipa hnu zulh in a thawngtha bia a ngai rih lo mi le a thei rih lo mi; cun Bawipa kong cu an theih bal nain a hnu zulh duh lo le a thawngtha bia ngaih a duh lo mi zong tampi an um rih. Bawipa hnu a zul mi hna cu Bawipa hrimrhrim nih a herh mi “rawl”(Jn 6:6) a dangh hna timi zong hi kan hmuh khawh.
Minung hna nih Siangpahrang si ding in thim an timh tikah mi bupi sin in aa zuk than i Pa Pathian he bia an chim tinak, thla a camnak siseh; a hnu zultu hna nih Bawipa an hngah lio caan ah ti cung in an sin a rat nak hna nih hin a thawn nak le a lianngannak kha a langhter. Minung sining in a si kho lo tiah ruah mi ti cung kalnak zong hi ‘Pathian caah cun zeizong vialte hi a si kho dih’ timi a langhter rih. Mithiang Paul zong nih “Thawnnak a ka petu Khrih thawngin thil zeipaoh ka tuah khawh ko hna”(Phi 4:13) tiah a ti ve.
Jesuh he khual kan tlawn a si ah cun kan i hmuitinh mi hmunhma kan phan kho hrimhrim lai. Nun zia lei in siseh, chawva lei in siseh kan nunnak ah lam a kan phenhtu zeitluk hmanh in tam hmanh sehlaw Bawipa cungah kan zumhnak zeitik hmanh ah der ter hna hlah u sih. Mithiang Peter le John nih ngamh sang ngai in: “Pathian mithmuh ah nanmah bia ngaih cu maw a tha deuh Pathianbia ngaih dah a tha deuh, ti cu nanmah nih ruat ko u” (Acts 5:19)tiin hruaitu hna le nawl ngeitu hna sin ah an chim bangin Bawipa bia le duh ning in a nung zungzal kho tu si cio hna u sih.