Bawipa ta kan si (Rome 14:7)

“Ahohmanh mah ca lawngah kan nung lo, ahohmanh mah ca lawngah kan thi lo; kan nun ahcun Bawipa caah kan nung i kan thih ahcun Bawipa caah kan thi. Cucaah kan nun ah siseh, kan thih ah siseh, Bawipa ta kan si.” (Rom 14: 7)

Nihin kan thieh mi thawngtha bia thiang (Lk 15:1-10) chungah misual mi hna Bawipa nih khamh dingin a kawl hna nak kha “Tuu tlau kong” bianabia in a kan cawnpiak. Tuu tlau he aa lomi misual hna kha Pathian nih a hmuh hna ah, Pathian sin an hun panh tthan tik hna ah fungfek in tuk i dantatnak pe loin, lunglawm thanuam tein ‘a liang ah aa khinh i inn ah a tlunpi’ (Lk 12:5) hna bangin vancung ram in a rak cohlaan zungzal ko hna. A kan sertu Pathian nih lungsau tein an sin kan kir tthan ding hi a kan duh piak zungzal ko, a kan kawl zungzal ko (Lk 15: 4). Jesuh nih: “Zeicahtiah Mi Fapa cu a tlaumi kawl awk le khamh awkah a ra”(Lk 19:10) tiah a ti.

Puai kan tuah tikah chawva a dih ning hi theih cio a si ko. Sihmahsehlaw misual mi hna an i ngaihchihnak, sual ngaihchihnak Sacrament kan tuah nak hna ah hin zeitluk in dah Pathian aa lawmh i zeitluk in dah man kan ngeih i a kan sunlawih timi hi hmuh khawh a si.

Jesuh hnu zul Khrihfa kan si kan ti ko nain misual tiah minung hmuhnak pedan in tah a si mi hna kha hrial kan hmang tawn. Kan mah le kan mah midang hna nakin a ttha deuh mi ah kan i ruat sual tawn. Sihmahsehlaw Pathian hmai ah cun aa tluk dih cio in dawt le khamhnak veel pek cio kan si (Rom 14; Efesa 4:7).

Bupi a rak hlawtu hna, bupi a rak kaltak tu hna le a rak soi tu hna Bupi chungah an hun kir tthan tikah lunglawm tein cohlaan khawh tthan thiamnak lungput kan ngeih a herh. Khrihfa kan si tiah aa ti ko ttung i lungput ttha lo a ngeimi kan si ah cun nihin Bupi nih a kan thimpiak mi cathiang (Lk 15:1-10) hi ttha tein rel tthan hna u sih. A zeng in a rak kir tthan mi si hna seh, dawh tein a rak kir tthan mi si hna seh Pathian sinah a rak kir tthan mi hna paoh cu lunglawm tein a cohlaan zungzal ko hna.

Khrihfa mi hna nunzia kong he pehtlai in mithiang Paul nih: “Ahohmanh mah ca lawngah kan nung lo, ahohmanh mah ca lawngah kan thi lo; kan nun ahcun Bawipa caah kan nung i kan thih ahcun Bawipa caah kan thi. Cucaah kan nun ah siseh, kan thih ah siseh, Bawipa ta kan si” (Rom 14: 7) tiah a ti.