Bawipa Thi Sa Puai

Dawtmi u le nau hna, Bawipa Thi le Sa (Corpus Christ) puai aa thawhnak konglam tlawmpal in zoh ta hna u sih.

Corpus Christi puai cu “Bawipa Thi le Sa” a hleiceh in upat nak pek nak puai a si. Hi puai ni hi Bawipa nih hmanung bik zaanriah an ei tti hna caan i changreu le mitsur hang in “a Thi le Sa” a sernak ni kha hun theih tthannak ni zong a si. Hi puai a hram thawh a rak si nak cu, Belgian sister nu, St. Juliana timi nih Bawipa Thi Sa upatnak a rak ngeih tuk nak in a rak i thawk mi a si.

St. Juliana cu a rak ngakchiat lio tein Bawipa Thi Sa a rak upat nak le zumhnak a ngei tuk mi a rak si i Siangbawi te le Bishop hna sinah puai tuah dingin a rak hal hna. Puai tuah ding a hal hna nak thawngpang cu Pope Urban IV sin ah a phan. Pope Urban IV nih St. Thomas Aquinas kha Bawipa Thi Sa konglam he pehtlai in upat pek nak le biaknak thlacam nak hna le hla hna a rak ttial ter. St. Thomas Aquinas zong nih Thiang Thlarau bawmhnak thawngin a rian cu a rak lim khawh. 1264 kum ah Corpus Christi “Bawipa Thi Sa” puai kum fatin tuah ding in ramkip, peng kip ah Pope Urban IV nih thawng a rak thanhter hna.

Hi puai pi cu Thumkomh Pathian puai a chang tu zarh, cacawn nili ni ah tuah a rak si tawn. Cucu a Thiang nili ni Bawipa le a zultu hna hmanung bik zaanriah an dum tti nak ni he a ni caan khah ter in tuah a rak si. Biaknak lei he pehtlai in tuahser ning cang hna a thar in remh tthan a si tikah Pope Paul VI nak nih vawlei cung um bishop vialte hna sinah Thumkhomh Pathian puai dih a changtu zarh ah “Bawipa Thi Sa” puai tuah ding in nawl a rak pek hna. 1970 kum thok in Catholic Bupi chungah “Bawipa Thi-Sa” puai cu hmunkip ah (ta-za-win) tuah a rak si.

Dawtmi u le nau hna, Jesuh Khrih cu siangbawi thluachuah pek mi changreu le mitsur hang chungah hin a um taktak. Bible cathiang kan rel mi ah siseh, bupi thlacamnak ah siseh, siangbawi te sin in siseh, a bik in thluachauh pek mi changreu le mitsur hang chungah hin a um taktak.

Thluachuah pek mi changreu le mitsur hang hna an rawh hlan lo chung paoh cu Bawi Jesuh Khrih a Thi le Sa sining in a um. Bawipa nih: “Keimah cu vancung in a rung ttum mi changreu ka si. Ka Thi Sa a ei mi paoh cu zungzal in an nung lai”(Jn 6:51). “Keimah ah hin i peh u law kei zong nanmah he kaa peh ve lai”(Jn 15:4) tiah a ti.

Dawtmi u le nau hna, hi tluk a sunglawi mi le a lianngan mi Bawipa Thi Sa a cohlaang kho mi si cu zeitluk in dah kan van a tthat. Hi puai ni ah hin kan um nak biakinn(Bawipa Thi Sa umnak) paoh ah phanh khawh i zuam cio hna u sih law, thangthat hna u sih, conglawmh hna u sih, thlacam hna u sih law Bawipa kha cohlaang hna u sih.