Bia

Photo Credit

Biachim khawhnak timi cu a man a sunglawi tukmi Pathian sin in kan hmuhmi laksawng a si. Minung cu Pathian nih ruah thiamnak thluak pekmi kan si caah chiattha thleidan khawhnak in tuah hnga ding mi le tuah lo hnga dingmi kan i thim hna i kan zulh tawn. Bianabia ah, “bia ka chim lai maw, chim lo dah?” tiin biakhiahnak kanmah le kanmah tein aa tuah kho mi kan si. Thil pakhat tuah in a dang thil pakhat kha a hrial thiam mi kan si. A dang saram hna cu chiatha thleidan thiamnak ngeih loin an duhnak (instinct) nih a fial hna ningin a nung mi an si.

Minung cu a dang saram hna nih an i ngeih khawh lomi “Hmur ka in biachim thiamnak” a ngeimi kan si. Vanzuang va te khi zoh hmanh hna u sih. Minung sin in an theih mi bia kaa khat/hnih an chim thiam ve tikah duh a nung tukmi ah rauh an si ko nain, a dang a chim thiam lomi vanzuang va hna caah cun sullam a ngei lomi aw thawng pakhat men a si ko men lai. A dang vanzung va hna caah zeihmanh santlaihnak a ngei lo.

Minung cu bia in pakhat le pakhat aa pehtlain mi kan si. Kanmah bangin minung a si ve ko nain bia a chim thiam lomi hna zong an um ve. Bia kan chim khawhnak cu Pathian thluachuah a si caah Pathian cungah i lawm zungzal hna u sih. Kan hmurka in Pathian thangthat zungzal hna u sih.

Minung cu biachimnak in kan lung chung sining a langhter kho tu kan si. I hmuh lonak caan a sau cang mi hawikom pahnih hna an i ton tikah an lungchung ummi kha bia tampi chimnak in an langhter tawn. Biachim ning le cang  aw cawi ning cang zoh in pakhat le pakhat sining aa thei kho mi minung kan si.

Lungthin tha a ngeimi hna nih bia an chim tikah an chimmi bia hna cungah lung awtawm in kan um tawn hna lo. Ka zumh tawn hna. Zeicah kan ti a si ah cun an lungthin tak tein bia an chim caah a si.  A lung aa nuam mi hna nih bia an chim tikah lawmhnak bia a chuak tawn. Aa hro, aa simi hna karlak ah bia nem chimnak in tlang a tla kho mi hna nih daihnak an chuahpi tawn ve.

Jesuh Khrih nih “A ngan a dammi thingkung nih thei chia a tlai lo, thingkung thalo zong thei tha a tlai ve lo. Thingkung paohpaoh cu an theitlai in hngalh khawh an si; hlingbut in theipi nan lo bal lo, theihmung bur in mitsur thei nan lo bal fawn lo. Mitha nih a lung chung i thil tha a khonmi chung khan thatnak a chuahter; mithalo nih a lung chung i thil thalo a khonmi chung khan chiatnak a chuahter. Zeicahtiah mi nih a kaa in a chimmi hi a lung chung i a khatmi kha a si” tiah a ti (Luke 6:43-45) .

Dawtmi u le nau hna, hi vawlei cung caan tawite chung kan nun lio te ah hin pawngkam a um mi hna caah thawngthabia a phuangtu le a karhter khotu si khawh zuam hna u sih.

Add new comment

5 + 6 =