Biaknak timi cu...

Biaknak kan timi ah hin a rak dirhtu hruaitu hna nih an i tleihmi le an i dirpi mi phunghram an um cio. Anmah an doctrine ning cio in an i hruai hna i an i cawnpiak cio hna.

Nihin kan theih mi cathiang (Matt 23:1-12) chung kan zoh tikah Jesuh nih biaknak phunglam he pehtlai in zeitin um ding le um lo ding timi fiang tein a kan cawnpiak. Biaknak nih a cawnpiak mi cu minung le Pathian karlak i pehtlaih nak lawng si loin minung le minung karlak zongah zeitin dah pehtlaihnak ngeih phung a si timi zong aa tel ve.

Pathian nih Moses hmang in Israel mi hna sinah nawlbia 10 a pek hna i pehtlaih nak a rak tuah. Hi nawlbia 10 chung kan zoh tikah Pathian le minung karlak ah ngeih ding mi pehtlaihnak an i tel bantukin minung le minung karlak zong ah zeitin dah pehtlaih nak ngeih phung a si timi zong aa tel ve.

Sihmahsehlaw, biaknak timi tlangtar hmang in Farasi mi hna le Sadusi mi hna nih Pathian pek mi phunglam nawlbia hna nak in a hlei in a chap hna i an duh paoh in an sersiam kha Jesuh nih a hmuh tikah sual a phawt hna. Biaknak timi cu mi harsa santlai lo hna kha bawmh ding, a sual a palh mi hna zong nih an lungthin aa thlen tthan i Pathian lei ah an i mer nak hnga ding caah a cawnpiak tu phung a si.

Midang hna nih ka tthatnak ka tuah mi hi ka hmu hna sehlaw ka thangtthat hna seh tiin a parpavuan in nun phung a si lo. Din lonak (Injustice) hmuh ko nain i hmuhter duh lo, hrial le lanhtak timi hna hi Pathian biaknak phunglam le cawnpiak nak hna he aa pialkalh mi an si. Hihi Jesuh Khrih hrimhrim  zong nih a duh lomi a si.

Injustice hmuh ko nain i theihter lo, i hmuhter loin hrial a hmang mi hna cu Pathian chim lo, minung hna hmanh nih an duh hna lo. Hmunhma a tthatbik nak le duh ttung, dinfel lo nak hmuh tikah cun doh ngam lo, chim rel ngam lo i um cu Farasi mi hna lungput a si. Jesuh nih, “Keimah hi lam le biatak le nunnak ka si”(Jn 14:6) tiah a chimmi kha kan zulh a si ah cun Jesuh Khrih kan i nun pi a si i tehte kan khan zong a si.

Jesuh Khrih nih a kan cawnpiak mi hna kha a zul kho i, zulh khawh mi hna kha a dir a nunpi kho tu Pathian fanu/pa ttha si khawh i zuam cio hna u sih.