Biaktak cu hloh khawh a si lo

Pakhat le pakhat i daw uh. Kan i dawt khawhlo mi cu duhfah hakauhnak ruangah asi. Nawlbia kan buar tikah kan sual. Phaisa hi duhtuk hlah u, chawva duhtuk hi duhfah hakauh ruangah asi. Kan chawva hi ṭhatnak caah hmang u sih (Fr. David)

Herod nih Jesuh thawngpang hna le khuaruahhar thil a tuah mi hna kha a theih tik hna ah a rak thahter hna mipa  tipil petu Johan timi kha thihnak in a hung tho ṭhan rua tiah a ruah i a thin a phang ngaingai. Herod nih tipil petu Johan cu hnawngtan in a rak thahter ko hna, sihmanhsehlwa a hman lomi thil a tuah mi nih khan mithla ṭhih bangin a ṭhihphoih peng timi kha kan hmuh khawh. Ning cang loin tuahser mi hna le hmuh mi thil hna nih hin daihnak a kan pe kho hrimhrim lo timi zong  kha theih ding a si.

Johan cu a thi taktak cang ko. Sihmahsehlaw a nunzia le a chimphuanmi profet bia hna cu a dik mi le Pathian duh ning in chimphuanmi hna an si caah Johan timi minung cu thi ko hmanhsehlaw a dikmi tuahsernak le bia hna cu thihter khawh an si hrimhrim lo. Hi vialte hi nihin Missa raithawinak chungah kan relmi (Mk 6:14-29) chungah fiang tein kan hmuh khawh. 

Kan Bawipa Jesuh Khrih zong a rak nahchuahtu hna nih an rak thah tikah a konglam le a dang zeizong vialte philh dih a si ko lai tiah an rak ruah ko nain “Lam le biatak le nunnak” (Jn 14:6) a simi Jesuh kong cu a hnu zultu hna nih pehzulh in nihin ni tiangin chimphuan le cawnpiak peng a si ko; cun i nunpi peng zong a si ko.

Dawtmi u le nau hna “Thildik-thilhmaan cu hloh khawh a si lo.” Pehzulh in a hung lang ṭhan zungzal ko lai. Tehte zong an khaan zungzal ko lai. Biatak le a hmaan mi hna kha hramhram in hrawh aa tim lengmang mi hna cu Herod bangin an thin a phang zungzal ko lai. An nunnak ah daihnak a um kho lai lo. An nun lio hrimhrim hmanh ah hremhmun (hell) ah thlak a simi hna bangin an si ko lai.