Biatak Lam Hmuhsaktu

“Hi biatak hi kan chimh hna: Van kha aa hun i Pathian vancungmi hna cu Mi Fapa cung i an ṭum le an kai kha nan hmuh lai.” (Jn 1:51)

Filip nih cun Nathanael kha a va hmuh i, “Phungbia cauk chungah a kong Moses nih a ṭialmi pa, profet hna zong nih a kong an ṭialmi pa kha kan hmuh cang. Amah cu Josef fapa Jesuh, Nazareth khuami kha a si,” tiah a ti. (Jn 1:45)

Vancung mi hna hi an um taktak ko. Cucu Jesuh chimmi bia a si (Jn 1:51). Cun ṭhawnnak lei in siseh, dawhnak lei in siseh a zeilei paoh in a tlamtling mi zong an si i a thianghlimmi zong an si. 

Nihin ni ah Bupi nih Van ralbawi a simi hna Michael, Gabriel le Raphael hna i puai a kan tuah piak. Van ralbawi a simi hna sinah taksa lei in siseh, thlarau lei in siseh pakhat cio nih kan herh cio mi bawmhnak zong hal fawn hna u sih. 

“Jesuh nih kan sining le hmai lei caan ah ka si te lai ding mi vialte a theih dih,” timi hi na zum kho tak maw? lungaw ṭawm in a ummi zong um khawh a si. Ṭha tein kanmah le kanmah bia halnak zong tuah ding a si. Biatak kan chim a si ahcun Jesuh nih kan sining hna le kan ruah ning vialte, kan zeizong vialte hna hi a theih dih taktak ko. 

Jesuh nih kan sining, kan ruah ning, kan si te hnga ding mi vialte a theih dih ko a si ahcun zei ruangah dah tukforhnak ah phakter loin a kan kilven hnga lo, asiloah sualnak tuah kan i timh caan paoh ah sualnak tuah lo dingin a kan thloh hnga lo ti zongin ruah khawh mi a si. A kan thloh lo nak sullam cu zalong tein i thim khawhnak nawl (freedom of choice) a kan pek caah a si. Ṭhatnak kan i thim, kan tuah a si ahcun thluachuah pek kan si ko lai. Sualnak kan tuah a si ahcun dantat nak kan ing ko lai. 

Bawipa nih hin freedom of choice a kan pek ko nain a dikmi le a hmaanmi lam le thil kan zulh, kan i thim khawhnak hnga ding caah bawmtu vancung mi hna a kan thlah piak zungzal ko. Anmah hna sin zongah khan bawmhnak hal zungzal hna u sih. 

Nihin kan relmi thawngṭhabia (Jn 1:47-51) chungah Jesuh nih Nathanael kong he pehtlai in a theih cia cang mi cungah Nathanael a khuaruah a harnak kong kan hmuh. Hi ka zawn ah hin “Pathian nih lungthin thiang tein amah a kawl mi hna cu a theih zungzal ko hna” timi kha kan hmuh khawh. Nathanael zong cubantuk minung a si ve. Nathanael nih cun, “Saya, nanmah cu Pathian Fapa na si. Israel mi Siangpahrang na si,” tiah lungthin thiang tein Jesuh sining kha a phuan ve. 

Cun Filip sining te zong hi zoh ṭhan hna u sih. Filip thawngin Nathanael nih Jesuh kha a hmuh. Filip nih a theih a hngalh mi thil ṭha kha amah ca lawngah aa chiah lo. A thup lo. Midang, hawidang kha a hrawmh ve hna. Filip bantuk lungthin kan ngeih cio zong a herh. 

Vancung mi hna nih an kan bawmh bantukin pakhat le pakhat bawmhnak i pe zungzal hna u sih. Bawmhnak a herh mi hna caah vancung mi si ve hna u sih. Thlacam zong i bawm hna u sih. Filip bantukin kan theih hngalh kan hawi le hna kha kan NUNNAK HRAMPI a simi  Pathian sinah a chuahpi kho tu le a kal pi kho tu si khawh i zuam zungzal hna u sih.