Biatak lam zultu hna

Hihi i cinken hmanh u: nu chungin a chuakmi lakah vawlei cungah hin Johan tlukin a nganmi ahohmanh an um lo. (Matthew 11:11)

Minung hna nih an upat an tihzah mi hna le an thangthat mi hna cu reng sang a ngei mi hna le fimthiamnak a ngeimi hna hi an si deuh tawn. Sihmahsehlaw Jesuh Khrih nih a thangthat mi hna cu lungthin thiang a ngeimi hna le Pathian duhnak a tuahmi, a zulmi hna kha an si.

Minung mithmuh in le leng lei sining hmuh ning in cun tipil petu Johan hi thangthat awk zeihmanh a um lo. A cheu nih cun mihrut a si rua ti zongin ruah khawh a si. Aa hruk aihmi thil hna le a ei mi rawl hna hi minung sining in cun a zeilei hmanh in duh a nung kho lo. Sihmahsehlaw Johan cu bia dik bia hman, a sining tak tein a chimtu le a phuangtu a si. Pathian Pennak caah thawngtha a phuannak zongah tih timi lungput ngeih loin a sining tak tein a chimphuang tu a si (Lk 3:1-20).

Kan Bawipa Jesuh Khrih nun ning kan zoh than a si ah cun minung sining in a Siangpahrang sining le Khamhtu a si nak kha cohlan khawh a har ngaingai. Mi lungthin tha mi hna lawng nih an rak hmuh khawh i an rak cohlan khawh. Hnipuan ttha aa hruk aih mi Farasi mi hna he kan tahchuh a si ah cun a zei lei hmanh in upat tlak le tihzah ding dirhmun in hmuh khawh a si lo. Aa hruk aih mi thilpuan hna hi mikip nih naih khawh dingmi sining in aa rak hruk aih mi a si.

Simahsehlaw, Jesuh siseh, Johan siseh midang vialte hna nakin a lian ngan deuh mi an rak si. Zeicah kan ti a si ah cun Pathian thlarau an cungah a um caah a si. An chimrelmi, an tuahsermi vialte cu a hmaanmi le a dik mi an si, khamhnak rian lawng te an si caah a si.

Dawtmi u le nau hna a dik a hmaan mi Jesuh Khrih, Pathian chungah a nung mi si khawh i zuam zungzal hna u sih. Lian ngannak timi cu tangdornak lungthin he Pathian duhmi tuah le zulh kha a si. Jesuh nih “Keimah hi lam le biatak le nunnak a si”(Jn 4:6) tiah a ti bantuk in kan nih hna zong biatak lam a cohlang a zul kho tu sinak in zungzal nunnak co khawh i zuam hna u sih.