Biatak Nawl Ngaih le Zulh

Midang thil ti khawh-sining he mah le mah pe i tah hi nahchuahnak a chuahter tu hrampi a si.

Nihin thawngtha bia chung i kan theih mi ah, pa a si mi nih a fapa pahnih dum kal ding in a fial hna nak kong kan theih. A si khawh cun a fapa pakhat khat nih “a si ka pa, ka kal ko lai” ti ah leh in a kal tak mi si kho hna sehlaw zohchunh awk tlak tak tak cu an si ko hnga. Sihmanhsehlaw, nihin thawngtha bia nih a kan cawnpiak duh mi ah minung kan zangdernak hi a langhter khawh ngai.

Pathian bia aa tleih tung i a zul tak lo mi phung bia cawnpiaktu saya hna le mifim, mithiam hna nih kan Bawipa cawnpiak mi cohlaang duh lo in, Pathian cawnpiak mi lam in a rak pial sual i mi sual cazin ah khumh mi ngunkuai kawl hna le hlawhhlang nu hna nih Bawipa cawnpiak nak an ngaih; an lung an i thleng i Bawipa hnu a zultu zong an hung si hna.

Nihin Khrihfa kan sining le kan nunning ah “Kei cu Khrihfa ka si, Khrih duh ning in ka nung lai” tiah ti in a nung kho tak tak mi kan si khawh a si ah cun zeitluk in dah zohchunh awk tlak le thangthat awk tlak kan si cio hnga. Cu tin kan nun khawh a si ah cun Pathian thinlung kan lawmhter khawh lai i, sermi thil hna cung zongah lunglawmhnak le daihnak a chuahter kho tu kan si ko lai.

Jesuh Khrih cu Pathian fial mi thil vialte cungah “Amen” tiah a ti i a nunnak in a langhter kho tak tak tu a si caah sermi thil viate hna zong Pathian he remnak a kan hmuh ter tu a si. Cu caah Amah cu “Daihnak Siangpahrang” tiah kan ti khawh nak hi a si.

Dawt mi u le nau hna, minung pakhat le pakhat cungah mah le mah cuai i thlai in pe i tah hna hlah u sih. Kan i zohchunh tak tak ding mi cu kan Bawipa Jesuh Khrih lawng hi a si. Minung pakhat kha kan idol ah kan i chiah a si ah cun kan palh sual lai. zeicah tiah minung a si ve caah zang dernak a ngei kho mi a si ve. Sihmahsehlaw, Jesuh Khrih kan i zohchunh a si ah cun zeitik hmah ah kan lung a dong lai lo i kan ngaih a chia fawn lai lo. Amah cu Pathian a si caah a kan fial mi rian (dum kal i fial mi fapa pahnih hna bantuk)  “ka nawl i cawn ve u” (Matt 11:29) a kan ti mi tuah khawh i zuam zungzal hna u sih.