Caan I Peknak

Nikhat ah ngakchia pa pakhat nih a nu kha:
Ngakchiapa = “Ka nu, lente i celh u sih,” tiah a ti.
A nu = “Ka fa, kaa manh rih lo.”
Ngakchiapa = “Zeiruang ah dah naa manh rih lo”.
A nu = “Rian tuan ding ka ngei rih”.
Ngakchiapa = “Zeiruang ah dah rian na tuan”.
A nu = “Rian tuan lawngah tangka kan hmuh lai”.
Ngakchiapa = “Zeiruang ah dah tangka cu na kawl”.
A nu = “Tangka kan ngeih lawngah rawl kan cawk khawh lai i rawl-ei awk kan ngei lai cu ta”.
Ngakchia pa te nih chikhat khua a ruah hnu ah a chimmi cu:
“ka nu, ka paw a tam rih lo,” tiah a ti.

Kan hnu kum 500 hrawng ah khan mithiang Benedict nih tluang tein nun thiamnak (good living) timi kong he pehtlai in a rak chim bal. Cucu “Thlacamnak, riantuannak le i dinh thiamnak” timi hna an si. Minung cu i dinh caan hi kan herh taktak ko. Dinh loin riantuan nak nih a herh lomi fahnak tampi chungkhar chungah siseh, pumpak pakhat cio cungah siseh a chuahter khawh.

Bawipa Pathian nih thil a ser hna nak kong he pehtlai in (Genesis 2:1-3) chungah kan hmuh mi cu: “Cuticun vawlei le van le an chung i a ummi thil viate cu ser an si. Ni sarihnak ni ah Pathian nih a tuahmi thil vialte cu a lim hna i cu ni ah cun rian tuan loin a um. Nisarih ni cu thluachuah a pek i a dang tein a chiah, zeicahtiah cu ni cu a thil ser a lim cang i riantuan loin a um ni kha a si,” tiah kan hmuh. Bible thiang chung kan hmuh bangin Pathian hmanh “aa din” a ti a si ah cun kan nih sermi minung hna chinchin cu thazang a dermi kan si caah kan i dinh ve awk a si. I dinh timi zongah hin i dinh sawhsawh loin pakhat le pakhat caah caan pek in kan i dinh thiam a herh. Pakhat le pakhat i lenkai nak, i vennak biaruah tinak tbk,…

Chungkhar lu bik a simi nu le pa hna zong nih fale caah caan pek thiam kan herh. A ngan a dam mi chungkhar ser kan duh a si ah cun chungkhar chung um pakhat le pakhat caah caan kan i pek ding a si.