Caan Pek

Chun hrawngah nifatin biakinn kal in caan tlawmpal thla a cam zungzal tawn mi Jim timi tarpa pakhat a rak um. Tlolh loin nifatin biakinn ah a ra mi Jim kha a rak hmu ziar tu biakinn zohkhenh tu pakhat nih Jim hi biakinn ah nifatin zeidah a rak tuah tawn hnga. Pakhat khat fir a duh ruangah maw a si hnga tiin a rak ngiat zungzal tawn. Nikhat cu Jim thlacam a dih in a kir lei innka pawngah biakinn zohkhenhtu pa nih cun a dir ter i, “Jim, nifatin biakinn ah na ra i zeidah na tuah tawn. Thla maw na rak cam?” tiah a hal. Jim nih cun, “A si, thla ka cam,” tiah a leh. Biakinn zohkhenhtu pa nih cun, “Minutes 2 chung te lawng thlacam cu a si kho lomi a si,” tiah zumh lo nawn in a rak ti.

Tarpa nih cun, “A si, kei cu thlacam zia zong ka thiam lo, ka duh ning in le ka theih tawk tein ka cam ko,” tiah a ti. “A si ahcun zeitindah thla na cam ning cu a si. Ka chim ve tuah,” tiah biakinn cawngtu pa nih a ti. Tarpa nih a leh mi cu, “Jesuh hi ka ah hin ka um ko. Jim ka si, ka ti i ka kir than ko,” tiah a leh.

Caan a hun rauh deuh tikah tarpa cu a dam ti lo i biakinn lei zongah a kal kho ti lo. A zawtnak a zual tuk caah Father pa kha an auh piak i hmanungbik Bawipa thisa pek nak le chitti thiang thuhnak an tuah piak. Thlacamnak a dih tikah Father pa nih tarpa cu bia a hal i, “Jim, hlaan ah cun biakinn te ah na ra tawn i ‘Jesuh hi ka ah hin ka um ko. Jim ka si’ na ti tawn i Jesuh na rak leng tawn. A tu ah teh Jesuh nih an leng bal ve tawn maw?” tiah capo in a ti. Jim nih cun Father pa kha a zoh i, “Father, ka sin na rat caan paoh ah thutdan pahnih in kan hal tawn a si ko lo maw. Pakhat cu Jesuh caah a si i pakhat cu nangmah caah a si. Jesuh nih a rak ka len zungzal ko. ‘Jim, hi ka ah hin ka um ko, Jesuh ka si tiah a ka ti,” tiah a leh. Jim cu Father pa he bia an i ruah cuahmah lio te ah khin khat te lei ah a hoih i a merh buin a nunnak a liam.

Dawtmi u le nau hna, Jesuh caah kan caan kan pek khawh a si ahcun Jesuh zong nih a caan a kan pek ve ko lai. Jesuh kan len a si ahcun Jesuh zong nih a kan len ve ko lai. Kan caan tha hna le kan thazang a um lio caan te ah hin Jesuh len khawh le Jesuh caah caan pek khawh i zuam ding a si.