Caan Pek Thiamnak Fimnak

Photo Credit

“Lamkaltu hna kha an ra tlung i Jesuh he khan an i tong i an tuahmi vialte le an cawnpiakmi hna vialte kha an chim.”(Mark 6:30)

Nihin ni caah Bupi nih ruah ti awk ah le thazang lak ti dingin a kan thimpiak mi Bible cathiang hna cu (1 Siangpahrang 3:4-13) le (Mark 6:30-34) an si. Bupi nih a kan thimpiak mi cathiang nih a kan cawnpiak duhmi cu “Bawipa Pathian nawl a zulmi hna cu teinak a hmu mi an si” timi hi a si.

Pathian nih, “Zeidah kan pek lai, ka hal tuah” tiah a ti tikah Solomon nih Bawipa sinah a hal mi cu, “Na mi hi uk khawhnak caah a tha le a chia kha ka thleidan khawh nakhnga, na salpa hi hngalhthiamnak lungthin ka pe tuah” thiah a hal. Solomon nih a hal mi tu Pathian nih a pek taktak. Cun Solomon nih Pathian cungah zumhtlak dirhmuh, Pathian chimmi bia a ngaih chung paoh cu Pathian nih a thluachuah he a um pi zungzal timi zong kan hmuh khawh.

Thawngthabia chung zongah zultu hna nih Jesuh fial ning hna tein an um chung paoh cu khuaruahharnak phunphun an tuah khawh hna nak kong kan hmuh. Cun zultu hna nih an riantuan nak in an rak kir hnu Jesuh sin an phanh tik Jesuh nih a daihnak hmun ah i din hna u sih tiah a sawm hna nak kong zong kan hmuh. Anmah te lawngin a daihnak hmun ah Pathian he i pehtlaih in thazang i lak ti ding caah a si.

Sihmanhsehlaw Jesuh nih zultu hna cawnpiakmi thawngthabia siseh, Jesuh cawnpiakmi thawngthabia siseh an theih an hngalh tikah an hnu in an zulh hna i an kal nak paoh ah an rak zulh hna. Hi thil sining kha Jesuh nih a hmuh tikah “mi vialte kha a zang an fak ngaingai, zeicahtiah khaltu a ngei lomi tuu bantuk an si. Cucaah thil tampi a cawnpiak hna” (Mark 6:34).

Solomon Siangpahrang nih Pathian sinin a hmuh mi fimnak in a mi hna kha tha tein a uk khawh hna bangin, Jesuh nih a hnu zultu si hna seh a thawngthabia phuanmi a ngaitu vialte si hna seh tha tein a uk  a cawnpiak khawh hna. Jesuh le a zultu hna cu an tha a ba taktak ko. Sihmanhsehlaw mipi nih Jesuh Khrih an herh taktak tikah Jesuh cu zeitlukin ba ko hmanh sehlaw amah a herh tak mi mipi kha caan a pek deuh hna. Kan nih hna zong nih a kan herh taktak mi hna kha caan pek thiamnak fimnak kan herh cio ve.

dawtmi u le nau hna Jesuh le a thawngthabia kha kan nih hna nih teh kan ti a hal i ti umnak kan panh bangin kan panh cio bal hna maw? Pathian rianthiang a tuan mi si hna seh, zumtu Khrihfa mi si hna u sih, pakhat le pakhat Jesuh nih mi bupi a hmuh hna i a zang an fah bang khan kan i zangfah thiam ve hna maw? Pakhat le pakhat kan bawmhnak kan i pe cio kho cang hna maw?

Kan nih Khrihfa mi hna cu Jesuh Khrih he aa lomi siding in kawh mi, auh mi kan si. Kan pawngkam ah aa lo cio lomi harsatnak phunthling a tongmi tampi an um hna. Jesuh nih mi bupi kha a zoh hna i a zangfah hna bangin kannih hna nih teh zangfah thiamnak lungthin kan ngei kho cio cang hna maw? Pakhat le pakhat kan i bawmh hi Bawipa nih a kan duh piakmi a si. Pathian nih dawtnak lungthin he tuah hna seh tiah a kan duh piakmi zong a si.

Tu lio kan chan ah hin Jesuh lungthin ngeih cio kan herh. Khrihfa mi hna lungthin ngeih kan herh. Midang nu/pa cungah bawmhnak na pek khawh mi cu tlawmte hmanh sisehlaw Pathian nih na cungah zeitlukin dah thluachuah an pek than lai timi kha ruat hmanh! Vancung sui ram nuam kha ruat hmanh.

Add new comment

5 + 4 =