Caan Peknak 

Photo Credit

“Cucaah zatlang lam ah khan va kal u law nan hmuhmi paoh vun sawn hna u.” (Matt 22:9)

“Cucaah khuazakip ah va kal u law miphun vialte kha a ka zultu ah va ser hna u.” (Matt 28:19)

Zarhpi ni caan tel ah khin Missa raithawinak chungah tel khawh dingin na caan ṭha tein naa pe kho tawn ko maw? Kan nih vialte hna zong Missa thawinak tuah caan paoh ah khin tel khawh dingin Pathian nih a kan kawh mi lawng te kan si. Missa thawinak ah kan i tel tik zongah kan caan tlawm te kan pek mi dah ti lo cun zei pipa khi sung lak in kan dih mi a um hlei lo. Biatak kan ti a si ahcun Missa thawinak chungah kan i tel khawhnak ruang hmanh ah Bawipa nih thluachuah a kan pek deuh timi kha theih ding a si. 

Nihin thawngṭhabia (Matt 22:1-16) chungah Jesuh nih “Vancung Pennak cu, a fapa caah nupi ṭhit rawl danghnak a tuahtu siangpahrang he aa lo” tiah a ti. Sihmanhsehlaw siangpahrang pa nih a kawh mi hna nih khan a lunglawmhnak a langhter mi ah lawmh pi ve dingin ahohmanh an rat lo tikah siangpahrang pa a lung aa thleng i zatlang lampi ah an hmuhmi hna paoh kha a chia a ṭha thlulo in, a va pumh ter hna i rawl danghnak khaan cu mi in a khah ter dih hna. A hramthawh ah rak kawh mi hna tu cu siangpahrang chungkhar hna he rawl dum ṭinak caan sunglawi an tlolh dih hna.  

Kan nih hna zong Missa raithawinak ah kan i tel ve lo tikah hibantuk hi kan si ve. Jesuh Khrih Pathian fapa he changreu cheu ṭi khawhnak caan ṭha kha kan tlolh tawn ve hna. Sihmanhsehlaw a caan caan ahcun thlarau lei in a kan hruaitu hna nih mipi an himnak hnga ding le mipi caah ṭhatnak a si hnga dingmi a si ahcun pumhnak kham caan te zong a um thiam ve. Bianabia ah covid-19 caan lio bantuk,… Cun kanmah leikap zong in zulh ding a si, tuah ding a si tiah a kan timi tete kha fel tein kan tuah ve ding a si. Bianabia ah TV or internet in thlahmi live Missa ah i tel te hna,…

Zeitluk hmanh in kan rian tam ko hmanhsehlaw Jesuh Khrih nih a kan kawhnak Missa thawinak ah hin cun tel khawh i zuam zungzal hna u sih. Cun a thluachuah zong tlolh lo tein cohlaan khawh i zuam zungzal hna u sih. 

Jesuh Khrih he Missa thawinak ah caan hmaan ṭi dingin na caan na pe kho tak ve cang maw?

 

 

Add new comment

2 + 9 =