Ceunak

Photo Credit

“Ahohmanh nih meiinn kha an van tikah kheng an khuh bal lo, ihkhun tang zongah an chia bal lo. Mi nih inn chung i an rung luh tikah ceunak kha an hmuh nakhnga mei vannak cungah khan ana van tawn.” (Lk 8:16)

Nihin kan thiehmi cathiang (Luke 8:16-18) bia hna nih kan thin an kan phaanter khawh men lai. Ahohmanh nih kan sining vialte kha midang nih thei dih hna seh tiah a duh mi an um bal lai lo. Cun an sining konglam midang hna nih an ceih mi zong a duh mi an um fawn lai lo. Midang hna nih kan konglam a kan theih dih a si ahcun a phunphun in biakhiahnak an tuah lai timi cu fawi tein theih khawh mi a si ko. Minung kan si caah pakhat le pakhat kar lakah kan sining a cheukhat hna cu thuh kan duh ko hna lai. Sihmanhsehlaw Pathian hmai tu ah cun zeihmanh thuh khawh an si lai lo. Muihnak chungah ceunak nih thil a langhter khawh dih bangin a si ko lai. 

Bawipa Pathian bia cu kan caah lam ding le lam hmaan a kan hmuhsaktu ceunak a si. Pathian bia ṭha tein ngaih ding le theihmi chim chin ding cu kan nih Khrihfa mi hna i kan rian zong a si. Ceunak hrampi a si mi Pathian sin in kan hmuhmi ceunak kha midang hna nih an hmuh cio ve nak hnga ding caah ceuter chin ve ding a si.

Bawipa Bia le a thawngṭhabia tam deuh kan ngaih, kan theih a si ahcun Bawipa thluachuah zong tam deuh in a co mi kan si ko lai. Kan Fim deuh lai i tukforhtu kut chung zongin kan him deuh lai. 

Bawipa bia nih kan zeizong vialte a langhter khawh dih bangin kan sining vialte hna zong a phuan khawh dih ko. Kan i hmuh khawh lo nak hna le kan i theih khawh lonak, kan philh mi vialte hna zong a kan theihter khawh dih ko.  

“Pathian bia cu a nung i a ṭhawng. Kap hnih har vainam nakin a haar deuh. Hlang lak in a cheu khawh, nunnak le thlarau an i tonak tiang, hliahcang le thlik an i tonnak tiang a cheu khawh. Minung lungthin duhnak le ruahnak vialte kha a hngalh dih. Pathian sinah thuh khawhmi thil zeihmanh a um lo. Sermi thil vialte hi an dihlak in a hmaika ah an lang dih hirhiar i amah sinah cun kan kong cu kan i chim cio lai.” (Heb 4: 12-13)

 

Add new comment

4 + 8 =