Ceunak le muihnak

“Vawlei hi mei in duah awkah pei ka rat cu, alh hluahmah cang seh law ka hei duh dah!” (Lk 12:49) tiah Jesuh nih a ti.

Ceunak le muihnak, chiatnak le tthatnak, Daihnak le buainak, ngaihchiatnak le lunglawmhnak tbt,… hna hi kan vawlei pi ah hin nifatin kan tonmi hna an si.

Nihin ni caah bupi nih ruah ti ding in le thazang lak ti ding in a kan thimpiak mi cathiang hna cu Rome 6:19-23 le Luke 12:49-53 hna hi an si.

Mikip nih daihnak cu ka duh cio mi a si i cu daihnak hmuh khawhnak ding ca zongah nifatin thazang chuah cio a si. Micheu khat nih daihnak min hmang in an mah duhmi lei zongah a hnuk mi an um len. Muihnak lei tu ah aa kalpi mi zong tampi an um.

Daihnak timi cu Pathian sinin a ra mi a si caah, Pathian sinin a ra mi minung hna nih daihnak cu kan kawl peng mi a si. Miring holh in daihnak timi cu “PEACE” ti a si. Peace timi biafang hi lunglawmh hnangamnak lei ah a chuahpi tu biafang a si. Mirang holh in “SILENT” kan timi zong khi Lai holh in cun a dai mi tiah ti a sit than hoi. Sihmahsehlaw “PEACE” timi le “SILENT”  timi biafang hna an sullam hi an i khat hrimhrim lo. Pawngkam ah dai hirhiar in a um cang a si ah cun thil pakhat khat a cang cang lai ti hi theih khawh a si.

Thlarau lei in siseh, taksa lei in siseh daihnak taktak kan hmuh khawhnak hnga ding caah thil pakhat khat cu kan tuah zungzal a herh ve. Kap khat lei in a dai lo mi kha kan tuk kan doh lawngah kap khat lei in a dai mi ka co khawh ko hna lai.