Chawva le minung

Pathian nih minung hi sermi thil dang vialte hna nak in a kan sunlawih bik mi kan si. zeicah kan ti a si ah cun “Amah muisam keng in sermi kan si caah a si” (Gen 1:26).

Kan nih minung a si mi hna tu nih hin pakhat le pakhat i dawt loin, zawn i ruah loin thilri chawva hna cung tu ah thlaihchannak lungthin kan ngei tawn. Minung pakhat le pakhat nak in phaisa, motor, innhmun, inn le lo, satil hna tu hi man ngei deuh ah kan ruah sual tawn.

Nihin kan relmi cathiang (Matt 8:28-34) chung kan zoh tikah Jesuh Khrih nih ttemtawntu thlarau thalo kut in minung a khamh hna nak kong kan hmuh. Jesuh Khrih nih zeitluk in dah a kan dawt i a kan sunsak timi kan theih khawh. Pathian hrimhrim nih a kan dawt ning theih in kan nih pakhat cio hna zong nih midang cungah dawtnak lungthin le bawmh duhnak lungthin kan ngeih a herh.

Thilri chawva le minung kan tahchunh tikah minung lei kap in a dir kho zungzal mi kan si a herh.